Ernst & Young: Germanııanyń avtokólik ónerkásibi básekedegi ornyn joǵaltyp jatyr
ASTANA. KAZINFORM — Ernst & Young (EY) konsaltıngtik kompanııasynyń zertteýinde nemis avtokólik óndirýshileriniń tabysy men paıdasy azaıyp, rentabeldiligi aıtarlyqtaı tómendegeni aıtylǵan, dep habarlaıdy DW.
EY málimetinshe, 2026 jyldyń birinshi jartyjyldyǵynda nemis avtokontsernderiniń tabysy 2,9%-ǵa tómendep, shamamen 284 mlrd eýrony quraǵan.
Al álemdegi 19 iri avtokólik kompanııasynyń jıyntyq tabysy 3,6%-ǵa ósip, shamamen 1,048 trln eýroǵa jetken. Japonııalyq óndirýshilerdiń tabysy 7,9%-ǵa, Eýropanyń basqa avtokontsernderiniń kirisi 9,8%-ǵa, amerıkalyq kompanııalardyń kórsetkishi 4,5%-ǵa, al qytaılyq óndirýshilerdiń tabysy 0,9%-ǵa artqan.
Osylaısha, negizgi avtokólik óndirýshi elder arasynda tabys ósimi boıynsha nemis kompanııalary sońǵy orynǵa túsken.
Germanııanyń úsh iri avtokontserniniń jartyjyldyqtaǵy jıyntyq paıdasy 13 mlrd eýrodan asty. Bul — 2017 jyldan bergi ekinshi eń tómen kórsetkish. Avtoónerkásiptiń budan da tómen nátıje kórsetken kezeńi tek 2020 jyly, COVID-19 pandemııasy kezinde bolǵan.
EY sarapshysy Konstantın Galldyń aıtýynsha, salaǵa eńbek aqysynyń, energııa tasymaldaýshylardyń jáne bıýrokratııalyq shyǵyndardyń joǵarylyǵy qysym jasap otyr. Sonyń saldarynan Germanııada avtokólik óndirý barǵan saıyn tıimsiz bola túsken.
— Sondyqtan nemis kontsernderi óndiristi tıimdiligi joǵary aımaqtarǵa kóshirý arqyly tyǵyryqtan shyǵýdyń jolyn izdep jatyr, — dedi sarapshy.
Qytaı naryǵy nemis kompanııalary úshin asa mańyzdy. Sebebi qysqa merzimde basqa óńirlerdegi kiristiń azaıýyn Qytaı naryǵynsyz óteý óte qıyn bolady. Ótken jyly Volkswagen, Mercedes jáne BMW kompanııalarynyń álemdik satylymyndaǵy Qytaıdyń úlesi 28,9%-dan 23,5%-ǵa deıin tómendegen.
Aıta keteıik, Reseıde avtokólik ónerkásibin damytýdyń jańa strategııasy bekitildi.
