Ernar Jıembaı jazany qylmystyq-atqarý júıesiniń ortasha qaýipsiz mekemesinde óteıdi

ShYMKENT. KAZINFORM — Shymkent qalasy ákiminiń orynbasary Rýslan Berdenovke qastandyq jasaýǵa qatysty rezonanstyq is boıynsha qylmystyq ister jónindegi aýdanaralyq sotta úkim shyqty. 

Sot sheshimimen sottalýshy Ernar Jıembaı Qazaqstan Respýblıkasy Qylmystyq kodeksiniń 24-babynyń 3-bóligi jáne 99-babynyń 1-bóligi boıynsha kináli dep tanylyp, 9 jylǵa bas bostandyǵynan aıyrý jazasyna kesildi. Jaza ortasha qaýipsiz qylmystyq-atqarý mekemesinde óteletin boldy.

Sot úkiminde Jıembaıdyń kinási jábirlenýshiler men kýálardyń jaýaptarymen, zattaı aıǵaqtarmen, sondaı-aq sot saraptamasynyń qorytyndylarymen tolyq dáleldengeni atap ótildi.

Jaza taǵaıyndaý barysynda sot onyń jasaǵan qylmysynyń sıpatyn, qoǵamǵa qaýiptilik dárejesin, jeńildetetin jáne aýyrlatatyn mán-jaılardy eskerdi. Atap aıtqanda, jeńildetetin mán-jaılar retinde sottalýshynyń buryn sottalmaǵanyn, kámeletke tolmaǵan balalary baryn jáne óz isine ókinish bildirgenin nazarǵa aldy. Al aýyrlatatyn mán-jaı retinde qylmysty masań kúıde jasaǵany kórsetildi.

Sot Jıembaıdyń áreketi asa aýyr qylmys sanatyna jatatynyn aıta kele, oǵan neǵurlym qatań jaza taǵaıyndaýdy oryndy dep tapty. Jazanyń jeńil túrin qoldanýǵa negiz joq degen qorytyndyǵa keldi.

Aıta keteıik, budan buryn Sot Ernar Jıembaıdy 9 jylǵa bas bostandyǵynan aıyrylǵanyn jazǵan bolatynbyz.