Ernar Jıembaı Rýslan Berdenovke qastandyq jasaý isi boıynsha jaýap berdi

TÚRKІSTAN. KAZINFORM — Aıyptalýshy oq atqan kúni mas bolmaǵanyn, alkogol tutynbaǵanyn aıtty.

Sýdıa Ábinur Qarabaev aıyptalýshy Ernar Jıembaıǵa kináni moıyndaıtyny jaıly suraq qoıdy. Ol kinásin moıyndaǵanymen, adam óltirý nıeti bolmaǵanyn jetkizdi. Aıyptalýshynyń aıtýynsha, áreketi tek qorqytý maqsatynda jasalǵan.

— Ol kezde men kúızelis pen qatty stress jaǵdaıynda boldym. Berdenov birneshe ret meni qorlap, «aqymaq» dep atap, balaǵat sózder aıtatyn. Óz erkimmen jumystan ketýimdi talap etti. Kelispegen jaǵdaıda qylmystyq jaýapkershilikke tartatynyn aıtyp, qorqytty, — dedi Ernar Jıembaı sotta.

Sondaı-aq aıyptalýshy olardyń áıelderi bir-birimen tanys bolǵanyn aıtty. Aıyptalýshynyń sózinshe, birde Berdenov Jıembaıdyń jubaıy jaıly: «ádemi eken, biraq meni qyzyqtyrmaıdy» degen. Osydan keıin, aıyptalýshynyń sózine qaraǵanda, Berdenov Instagram jelisinde onyń jubaıynyń birneshe fotosýretine «laık» basqan.

Memlekettik aıyptaýshynyń: «eger onnan astam ret jumystan ketýge májbúrleý túrinde qysym kórgen bolsańyz, nege tıisti organdarǵa aryzdanbadyńyz?» degen suraǵyna Jıembaı jaýap bere almady.

Ol oqıǵa bolǵan kúni Berdenovke: «Men kinásiz bolsam da, kináli bolyp turmyn» dep aıtý úshin kelgenin málimdedi. Onyń aıtýynsha, ol Berdenovti týra kózdemegen, tek qorqytý maqsatynda tórt ret oq atqan.

Sondaı-aq aıyptalýshy oq atqan kúni mas bolmaǵanyn, alkogol tutynbaǵanyn aıtty. Onyń aıtýynsha, tergeý kezinde basqa málimetterdi qysymmen bergen — ıaǵnı, ómir boıy bas bostandyǵynan aıyrylýy múmkin ekenin aıtyp qorqytqan.

Budan bólek, Jıembaı aldyn ala tergeý kezinde bireýler ózinen qastandyqty uıymdastyrý týraly tapsyrysty Shymkent ákimi bergen degen nusqany aıtýyn suraǵanyn jetkizdi. Aıyptalýshynyń aıtýynsha, Berdenov munyń esesine «bárin rettep beremin» dep ýáde etken.

Al osy arada sot otyrysynan keıin Berdenovtiń resmı ókili málimdeme jasap, Jıembaıǵa onyń senim bildirýshisi atynan eshkim júginbegenin aıtty. Onyń sózinshe, Berdenovtiń múddesin bildirýge quqyǵy bar jalǵyz adam — ózi ǵana.

Aıta keteıik, budan buryn Shymkenttegi mamandandyrylǵan aýdanaralyq qylmystyq ister jónindegi sotta qala ákiminiń orynbasary Rýslan Berdenovke qastandyq jasaý isi boıynsha basty sot protsesi bastalǵanyn jazǵan bolatynbyz.

21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.

Al 25 sáýirde sheneýnikke oq atqan kúdiktiniń ákesi málimdeme jasady.

Rýslan Berdenovtiń aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.