Ernar Shirbaev Taldyqorǵan qalalyq polıtsııa basqarmasyna basshy boldy
Іshki ister mınıstrliginiń buıryǵymen Taldyqorǵan qalasynyń polıtsııa basqarmasyn Ernar Shirbaev basqarady. Kazinform bul týraly Jetisý oblystyq Polıtsııa departamentine silteme jasap habarlaıdy.
Ernar Myrzahmetuly Shırbaev «polıtsııa podpolkovnıgi» arnaıy ataǵyna ıe. Jedel-tergeý bólimshelerinde jumys istedi. Іshki ister organdaryndaǵy qyzmetin Taldyqorǵan qalalyq ishki ister basqarmasynyń jedel ýákili qyzmetinen bastaǵan.
2011-2022 jyldary Jetisý oblysynyń Qaratal, Panfılov, Aqsý, Eskeldi, Alakól aýdandary men Almaty oblysy Qarasaı aýdanynyń ishki ister bólimderinde basshylyq quramda eńbek etti.
2022 jyldyń shilde aıynan osy ýaqytqa deıin Aqsý aýdandyq polıtsııa bóliminiń bastyǵy boldy.
Eske salaıyq, Taldyqorǵan qalalyq polıtsııa basqarmasynyń osyǵan deıingi bastyǵy Marat Kúshtibaev 15 qarashada qyz zorlady degen kúdikpen eki aı merzimge qamaýǵa alynǵany habarlandy.
Osy kúni Іshki ister mınıstri Jetisý oblysy Polıtsııa departamentiniń bastyǵy Atyǵaı Arystanovty qyzmetinen bosatty. Sondaı-aq departament bastyǵynyń kadr saıasaty jónindegi orynbasary Talant Jumabek pen tergeý boıynsha orynbasary Maqsat Erejepov te jumystan ketti.
Jetisý oblysy PD bastyǵynyń mindetin polıtsııa general-maıory Arman Sadanov atqarady. Buǵan deıin ol ІІM ózindik qaýipsizdik departamentin basqarǵan.
