Ernar Sadyrbaev: Bıyl mádenıet salasynda tyń jańalyqtar bolady
QOSTANAI. QazAqparat - «Ámire» laqap atymen tanymal ánshi Ernar Sadyrbaev bıyl mádenıet salasynda tyń jańalyqtar bolatynyna senimdi. Sondaı-aq, ol Dımash ekeýiniń shyǵarmashylyq baılanysy týraly aıtyp berdi, dep habarlaıdy QazAqparat tilshisi.
Elbasy Jastar jylynyń saltanatty ashylýynda jastardy qoldaý memlekettik saıasattyń basymdylyǵyna aınalatynyn atap kórsetti.
Ernar Sadyrbaevtyń aıtýynsha, Elbasynyń júktegen tapsyrmalaryn oryndaýǵa jastar belsene úles qosýy tıis.
«Jasyratyny joq, Jastar jyly keıbir aıtýly datalar sııaqty urandatyp, jeleýletip ótkizetin jyl emes. Prezıdent osyǵan basa nazar aýdarýdy tapsyrdy. Qoǵamnyń mańyzdy bóligin quraıtyn jastarǵa keń múmkindik berilýi tıis ekenin aıtty. Ásirese, jastar týrızmi týraly joba unady. Bul shara josparly túrde iske assa, tól mádenıetimizdi damytýǵa taǵy bir serpin bolary sózsiz. Meniń oıymsha, bıyl mádenıet salasy tyń jańalyqtarymen erekshelenedi, birneshe daryndy jańa esimdi tanıtyn bolamyz. Sebebi, memleket jastarǵa jan-jaqty qoldaý kórsetedi. Ár jas maman, berilgen múmkindikti paıdalanyp, óz salasyndaǵy jetistikterdi saralap, ózin-ózi qamshylap, zaman talabyna saı jańany úırenýge tyrysyp júrýi kerek. Bul el namysyn shetelderde qorǵap júrgen jastarǵa eki ese jaýapkershilik júkteıdi», - deıdi Ernar Sadyrbaev.
Eske salsaq, qostanaılyq ánshi «Slavıan bazary» halyqaralyq baıqaýynda birinshi oryn ıelengeni úshin «Daryn» memlekettik syılyǵyn aldy. Bul Ernar Sadyrbaevtyń halyqaralyq dárejedegi ekinshi iri jeńisi. Buǵan deıin Praga qalasynda ótken eki birdeı án baıqaýynan Gran-Prı júldesin utyp alǵan edi.
Ánshiniń sózinshe, ár baıqaýdyń aldynda áriptesi Dımash Qudaıbergen habarlasyp, aqyl-keńesterin aıtyp otyrady.
«Dımash meni únemi qoldap júredi. Bir jaǵynan, buǵan ózim tańǵalamyn. Jaqynda «Slavıan bazarynyń» aldynda óziniń aqyl-keńesin, usynystaryn aıtty. Meniń jeńiske jetýime sonyń kómegi kóp boldy. Dımash - fenomen. Jas ta bolsa, uly tulǵalardyń qataryna endi. Bulaı dep aıtsam, eshkim artyq deı qoımas. Dımash Qytaıda júrse de, qazaqylyqty birinshi orynǵa qoıady. Ár kezdesken saıyn qazirgi jastardyń jaǵdaı, boıjetkenderimizdiń baǵyty, mádenıettegi jańalyqtardy talqylap otyramyz. Dımash ekeýmizdiń kózqarasymyz bir jerden shyǵady. Soǵan qýanamyn», - dedi jas ánshi.
Aıta keteıik, keshe QR Prezıdenti Nursultan Nazarbaev Jastar jylynyń ashylýyna arnalǵan resmı sharaǵa qatysty. Saltanatty rásimde Memleket basshysy Jastar jylynyń mańyzdylyǵy týraly sóz sóıledi.
