Ernan Krespo: Qazaqstan shaqyrsa keler edim
- Ernan myrza, qosh keldińiz! Qazaqstan fýtboly týraly ne bilesiz?
- Shynymdy aıtsam, Qazaqstannyń fýtboly týraly kóp bile bermeımin. Sizderdiń komandalaryńyz (Astana - avt.) «Seltık» klýbyna qarsy oıyn ótkizetinin estidim.
- Qazaqstan fýtboldy damytý baǵytynda qandaı qadamdar jasaýy kerek?
- Komanda týraly eshteńe bilmeı jatyp, naqty keńes aıtý óte qıyn. Eger oıynyn baqylaı alsam, naqty aıtar edim. Ótken tarıhynda jetistikke jetpegen, keleshegi alda memleket úshin ortaq keńes aıtýǵa bolady. Eń aldymen, damý úshin oqý kerek. Fýtboldan jetistikke jetkize alatyndaı, fýtboldyń qudiretin sezdiretindeı, fýtboldyń baı mádenıetin jetkize alatyndaı bilikti mamandardy shaqyrǵan abzal. Álbette, eýropalyq mamandardy tartý kerek. Sebebi bul óte mańyzdy.
- Býtsany shegege ilgennen keıin Sizdiń jattyqtyrýshylyqqa bet burǵanyńyzdy bilemiz. Qazir qaıda júrsiz?
- Qazirgi ýaqytta «Parma» fýtbol klýbynyń vıtse-prezıdentimin.
- Jas kezińizden-aq, «Parma» qatarynda jasyndaı jarqyldaǵanyńyzdy bilemiz. Italııadaǵy «ejelgi qarsylastar» Inter men Mılan úshin de dop teptińiz. Sońǵy atalǵan eki komandanyń qaısysyna búıregińiz burady?
- Jo-joq. Men argentınalyq «Rıver Pleıt» komandasynyń jankúıerimin.
- Reseı quramasyna qarsy ótkizilgen búgingi fınalda kórinbedińiz...
- Germanııamen ótken matchtyń sońǵy mınýttarynda jaraqat alyp qaldym (dep kúlip jaraqat alyp qalǵan sol aıaǵyn kórsetti). Osy sebepti alańǵa shyǵý múmkin bolmady.
- Fýtboldy damytýda oqý protsesi óte mańyzdy ekenin atap óttińiz. Jaqsy usynystar bolsa, Qazaqstannyń jas jetkinshekterin sportqa baýlýǵa nemese olarmen sheberlik synybyn ótkizýge taǵy da keler me edińiz?
- Qazirgi ýaqytta «Parma» úshin barymdy salyp eńbektenip júrmin. Biraq bul jaqsy usynystar kelip jatsa barmaımyn degen sóz emes. Kez kelgen kelisimge nazar burýǵa ázirmin. Eger joba qyzyqty ári aınalysýǵa turarlyq bolsa nemese onyń artynda úlken ıdeıa turatyn bolsa, mundaı mazmundaǵy usynys meni qyzyqtyrmaı qoımaıdy. Óıtkeni fýtbol maǵan syılaǵan ómirlik baqytty, men úırengen sheberlikti basqa bireýge berýge múmkindigim bolyp jatsa, bul men úshin zor qýanysh bolar edi. Árıne, biraq bunyń bári meniń qolymda emes. Jobany bastaýshylar ózderi shesher. Álemdi kezip úırengenmin. Men úshin asa qıyn problema emes.
- Eger Qazaqstannan naqty ári tıimdi usynys kelip tússe?..
- Nege kelmeske!?
- Jas býynnan góri, jańa ǵana sheberlik synybynan ótken balalardyń kóbinese ákeleri Sizge kóbirek den qoıyp jatyr. Qazirgi tańda fýtbol juldyzdarynyń aýysýy tym jyldam júrip jatqanyna qalaı qaraısyz?
- Men úshin eń bastysy - qolymnan kelse balalarǵa fýtbolǵa degen sheksiz adaldyǵymda bere bilýimde. Boıymda fýtbolǵa degen adaldyǵym bar.
- Qazirgi jas býyn fýtbolshylar arasynda qaı fýtbolshyny stıli jaǵynan ózińizge jaqyn oıynshy retinde kóre alasyz?
- Bilesiz be, men bir talantty fýtbolshy shyǵa qalsa «o, mynany qarańdar, bul jańa Maradona» dep shý ete túsetin eldenmin. Biraq men mundaı teńeýlerdi unata bermeımin. Óıtkeni siz jańa ǵana fýtbol álemine qadam basyp kele jatqanyńyzda, sizge osyndaı laqap at tańyp qoıǵannan keıin bul óte zor jaýapkershilik artyp jiberedi. Aınalyp kelgende mundaı teńeý fýtbolshyny buzady. Sondyqtan men eshkimdi «jańa Krespo» dep ataǵym kelmeıdi. Men barymmen maqtanamyn. Ózimniń fýtboldaǵy júrip ótkenime qýanamyn.
- Biraq mundaı saýal sport taqyrybyn jazatyn tilshilerdiń «dástúrli suraǵyna» aınalyp ketken joq pa?
- Men sporttyq tilshilerdi túsinemin. Bul suraq olarǵa yńǵaıly shyǵar. Alaıda fýtbolshylar úshin bul óte aýyr. Kóptegen oıynshylar osyndaı qysymdarǵa shydamaı óz-ózderin joǵaltyp alǵan. Árbir talapty oıynshy óz úlgisimen eldi tańǵaldyra bilsin.
- Qazaqstandyq fýtbol jankúıerlerine ne tiler edińiz?
- Jyly qabyldaǵan úshin barlyqtaryńyzǵa rahmet! Qazaqstanǵa tuńǵysh ret jolym túsip otyr. Astana qalasy óte kórikti shahar eken. Ózim aıtqanymdaı, usynystarǵa ashyqpyn. Múmkindik bolsa, qaıta kelýge tyrysamyn.
- Suhbat bergenińiz úshin kóp rahmet!
FOTO: forzaitalianfootball.com