Ermurat Bápı: Zań men tártip saqtalǵan qoǵam ǵana damı alady
ASTANA. KAZINFORM — Ermurat Bápı podkasttardyń birine bergen kólemdi suhbatynda Qazaqstandaǵy «Zań men tártip» qaǵıdatyn qamtamasyz etý máselesine de toqtaldy. Ol sońǵy jyldary elimizde jol qozǵalysy qaýipsizdigin arttyrýǵa, qoǵamdyq tártipti qamtamasyz etýge jáne azamattardyń quqyqtyq mádenıetin qalyptastyrýǵa baǵyttalǵan birqatar zańnamalyq ózgerister júzege asyrylǵanyn atap ótti.
Ermurat Bápıdiń pikirinshe, zań ústemdigin qamtamasyz etý — tártipti saqtaıtyn, mádenıetti qoǵam qalyptastyrýdyń eń mańyzdy alǵysharty.
— Zańdy saqtap ómir súretin urpaqty tárbıeleýdiń budan basqa jolyn kórip turǵan joqpyn. Kameralar ornatý, aıyppul engizý — munyń bári adamdardy jazalaý úshin emes, qoǵamda tártip saqtaý mádenıetin qalyptastyrý úshin jasalady. Tek aýyzsha tártipke shaqyrý jetkiliksiz. Mádenı minez-qulyq naqty tetikter arqyly qalyptasady, — dedi depýtat.
Ermurat Bápıdiń aıtýynsha, ózi de zań talaptaryn saqtaýǵa erekshe mán beredi.
— Sońǵy birneshe jylda jol qozǵalysy erejesin buzǵanym úshin birde-bir ret aıyppul tólegen joqpyn. Sebebi zań talaptaryn da, qoǵamdyq tártipti de buzǵan joqpyn. Eger ár adam zańdy saqtasa, búkil qoǵam ózgeredi, — dedi ol.
Depýtattyń pikirinshe, búginde «Zań men tártip» qaǵıdaty memlekettik saıasattyń negizgi baǵyttarynyń birine aınaldy. E. Bápı qarapaıym mysal keltiredi: zań buzbasańyz, aıyppul da tólemeısiz. Onyń aıtýynsha, aıyppuldar zańǵa baǵynatyn azamattardy qorǵaıdy. ıAǵnı quqyq buzýshylyq azaıǵan saıyn, joldan ótý kezinde nemese basqa da qoǵamdyq oryndarda qaýip-qater de azaıady.
— Árıne, synnyń da oryndysy, orynsyzy bolady. Áleýmettik jelilerde kóbine jaǵymsyz pikirler taralady. Keıde mundaı pikirler shynaıy jaǵdaıdy kórsetýden góri, kópshiliktiń nazaryn aýdarý nemese qoǵamdyq rezonans týǵyzý úshin ádeıi ásirelenetindeı áser qaldyrady, — dedi Ermurat Bápı.
Redaktsııadan qosarymyz, spıkerdiń bul pikirinde negiz bar. Óıtkeni áleýmettik jelilerdiń algorıtmderi paıdalanýshylarǵa eń aldymen kóp qaralym jınaıtyn jaǵymsyz kontentti usynady. Bir ǵana jaǵymsyz jarııalanymǵa laık bassańyz, áleýmettik jeli sizge soǵan uqsas teris mazmundaǵy materıaldardy kóbirek kórsete bastaıdy.
