Ermurat Bapı Ulttyq Olımpıada komıteti týraly: Shal-shaýqandardyń basshylyǵymen jeńiske jetý qıyn
ASTANA. KAZINFORM – Májilis depýtaty Ermurat Bapı Ulttyq Olımpıada komıtetin olgıarhtardan alastaýdy usyndy.
«Qazaqstan Ulttyq Olımpıada komıtetiniń prezıdenti qyzmetine Tımýr Qulybaev kelgennen beri eldiń sporttyq jetistikteri quldyraı bastady.
Mysaly, sońǵy Tokıodaǵy jazǵy Olımpıada oıyndarynda bizdiń sportshylar birde-bir altyn nemese kúmis medal alǵan joq, tek 8 qola medalmen qaıtty. Al medaldyq esepte bizdiń elimiz 83 orynǵa bir-aq tústi!
1994 jyldan 2014 jylǵa deıingi Jazǵy Azııa oıyndarynda qazaqstandyq sportshylar turaqty túrde 4-5 oryn alyp kelgen edi. 2018 jyly biz 9-shy orynǵa, al 2023 jyly 11-shi orynǵa tústik!
Shamamen, Parıjde de osynyń kebin kııýimiz ábden múmkin. Bul bizdiń quramamyz derbes el retinde Qazaqstan atynan qatysatyn segizinshi Olımpıada oıyndary bolmaq», - dedi ol depýtattyq saýalynda.
Depýtattyń málimetinshe, táýelsizdik jyldarynda qazaqstandyq sportshylar 11 sport túrinen 14 altyn, 22 kúmis jáne 35 qola medal jeńip alǵan.
«1996 jyldan 2016 jylǵa deıin Qazaqstan barlyq jazǵy Olımpıada oıyndarynda eshqashan altynsyz qalmaı, álemdegi úzdik 40 eldiń qatarynan túspedi.
Bul rette, elimizde fýtboldyń birshama qarqyndy damyp jatqanyn atap ótken jón. El Prezıdentiniń ózi ulttyq qurama oıynyna qoldaý kórsetý úshin sońǵy kezderi fýtbolǵa arnaıy baryp júr.
Taǵy bir atap óterlik jáıt – Tımýr Qulybaev kelgeli Ulttyq Olımpıada komıtetiniń basshylyǵyna kileń Eski Qazaqstannyń ókilderi iriktelip alyndy. Onyń ishinde, bir-birine aınymas quda-jekjattar men mıllıarder kúıeýdiń olıgarh-dostary órip júr.
Sonymen qatar komıtetke múshe bolyp saılanýǵa 70 jastyq shekteý belgilengen. Qazirgi múshelerdiń ishinen bul jastan asyp ketkender de, kúni erteń tolaıyn dep otyrǵandar da bar.
Ulttyq Olımpıada komıteti basqarýshy organynyń osyndaı shal-shaýqandar quramymen qandaı jeńiske jetýge bolady?
Onyń ústine, barshaǵa málim, Tımýr Qulybaev Qazaqstannyń eń iri 50 jeke bıznesi qataryna kiretin kompanııalardyń aktıvterin ıelene otyryp, birqatar iri bıznes jobalardy baqylaıdy. Onyń ishinde: «ALMEKS» Holdıngtik toby, «Kaspıı Munaı» jáne «Retro Retail» munaı kompanııalary bar.
Mundaı shamadan tys júktememen onyń olımpıadalyq sport túrlerin damytýǵa múldem ýaqyty jete beredi dep oılaımyn. Onyń oıy - eldiń munaıyn satyp, qaltasyn toltyrý. Sportty qaıtsin ol?!» - deıdi Ermurat Bapı.
Onyń paıymynsha, Ulttyq Olımpıada komıtetiniń jumysynda «Ádiletti Qazaqstan» baǵytynda transformatsııa áli de júrip jatqan joq.
«Osy rette:
1. Parıjdegi Olımpıada aldyndaǵy lıtsenzııalyq sporttyq týrnırlerge baı-baǵlandardyń ókilin emes, aýyldan shyqqan, kókireginde namysy bar patrıot, kásibı sportshylardy aparý qajet.
2. Sport salasyndaǵy jemqorlyq pen sybaılastyq, tanys-tamyrlyqty túbimen joıý kerek.
3. Ulttyq Olımpıada komıtetiniń basshylyq quramyna revızııa jasap, olardy tek jas, Jańa Qazaqstan ókilderinen jasaqtaý kerek», - dedi Májilis depýtaty.
