Ermurat Bapı: Partııalyq saılaý júıesine túbi bir kelýimiz kerek edi

ASTANA. KAZINFORM — Májilis depýtaty Ermurat Bapı Prezıdent Qasym-Jomart Toqaevtyń Parlamentti partııalyq tizim boıynsha saılaý arqyly jasaqtaý týraly bastamasyn qoldaıtynyn aıtyp, depýtattyq saýalyn qoǵamǵa joldady. 

— Prezıdenttiń parlamenttik reforma jasaý jolyndaǵy bastamasyn erekshe atap ótý kerek. 30 jylǵa jýyq saıasat arenasynyń bir pushpaǵynda júrgen men ózim bul reforma Qazaqstan Parlamentin naqty saıası kúshke aınaldyrýǵa, yqpaldy Parlament formýlasyn shynaıy júzege asyrýǵa baǵyttaıdy dep sanaımyn.

Biz osyndaı reformalar arqyly qoǵamnyń saıası belsendiligin arttyrýǵa jáne ózin-ózi basqarý júıesin damytýǵa baǵyttalǵan bastama dep qabyldaımyz.

Qalaı bolǵanda da, kúnderdiń kúninde biz partııalyq saılaý júıesine kelýimiz kerek edi. Biz halyqaralyq qoǵamnyń bir bólshegi retinde álemde qalyptasqan, ázirge basqa formasy tabylmaǵan jalpyǵa ortaq partııalyq saılaý júıesine birtindep kóshýimiz kerek bolǵan, — dedi depýtat.

Ermurat Bapı Eýroodaq memleketteri partııalyq saılaý arqyly Parlamentinen bólek Úkimetin de saılaıtynyn eske saldy.

— Bılikti ońdy-soldy synaý daǵdysy súıegine ábden sińip qalǵan, tyrnaq astynan kir izdeý «kásibı» dástúrine aınalǵan jekelegen saýatsyz belsendiler men saıasatker-symaq azamattar osy bastamanyń ózinen kinárat izdep, kesheli-beri álden kesek atyp álek bolýda.

Meniń qazaq qoǵamyna arnap, depýtattyq saýal formasyn paıdalanýyma bizdiń dál osy keritartpalyǵymyz sebep bolyp tur, — dedi Májilis depýtaty.

Eske salsaq, Prezıdent Qasym-Jomart Toqaev bıylǵy Joldaýynda bir palataly Parlament qurý týraly bastama kóterip, partııalyq tizim boıynsha saılaý júıesin qaıtarýdy usynǵan bolatyn.