Ermurat Bapı EKSPO isin qaıta kóterýdi usyndy

ASTANA. KAZINFORM — Májilis depýtaty Ermurat Bapı EKSPO-2017 halyqaralyq kórmesi boıynsha sottalǵandardyń máselesin qaıta qarap, jemqorlyq faktilerine shynaıy kinálilerdi anyqtaýdy surady. 

Depýtat Bas prokýror Berik Asylovqa joldaǵan saýalynda EKSPO-2017 Ulttyq kompanııasy basqarmasy tóraǵasynyń orynbasary bolyp júrip sottalǵan Murat Omarovtyń áleýmettik jelidegi suhbatynda aıtylǵan málimetterdiń negizinde isti qaıta kóterý kerektigin aıtady. 

— Ádilet eshqashan jartykesh bolmaıdy. «Ádiletti Qazaqstan» ıdeıasyn qalyptastyrý úshin aqıqatty anyqtaıtyn kez keldi. Bul sııaqty «para berý» jáne «jemqorlyq» jeleýimen qýdalanǵan tulǵalardyń qatarynda — arǵysy Ákejan Qajygeldın men Ǵalymjan Jaqııanovtan bastap, bergisi — Serik Ahmetov pen Jaqsylyq Dosqalıevqa deıin birqatar qııanatty is bar. Bas prokýratýra bulardy da tolyq reablıtatsııa jasaýǵa bastama jasaıtyn ýaqyt boldy dep esepteımin, - dedi Ermurat Bapı.

Buǵan deıin Májilis depýtaty Edil Jańbyrshınniń Energetıka mınıstrligin aýktsıonnan tys tikeleı úkimetaralyq kelisimder jasaýǵa áýestenip ketti dep synaǵanyn jazǵan edik.