Ermuhambet Ertisbaev «Habarda» tok-shoý júrgizedi: Telearna jańa maýsymyn tanystyrdy

«Jańa maýsymda agenttik 11 jańa serıal usynady. Onyń úsheýi - «Qalamger», «Bekzat» jáne «Batyrlar joly» tolyqmetarjdy fılm retinde el kınoteatrlarynan kórsetiledi. Osy jeksenbide nazarlaryńyzǵa «Central Asia`s Got Talent» aýqymdy halyqaralyq shoýy kórsetiledi. Onda Qazaqstan, Qyrǵyzstan, Ózbekstan jáne Tájikstan ókilderi óner kórsetedi. Sonymen birge, kópshiliktiń kóńilinen shyqqan «Topjarǵan» shoýynyń ekinshi maýsymyn bastaımyz», - dedi «Habar agenttigi» AQ Basqarma tóraǵasy Erlan Bekhojın «Qazmedıa» ortalyǵynda ótken tusaýkeserde.

Onyń aıtýynsha, jańa maýsymda «Habar» jańalyqtar berý tásilin ózgertedi jáne ótkir taqyryptardy kóteredi.

«Jańa maýsymda jańalyqtar berý tásili ótkirlep, saraptamalar tereńdeı túsedi. Biz qala, aýdan, oblys turǵyndaryna óz ákimderin baǵalaý múmkindigin beremiz. Mundaı baǵdarlamalar kóp bolady. Elimizdiń belgili tulǵasy Ermuhambet Ertisbaev júrgizetin jańa saıası tok-shoý da qyzyǵýshylyq týdyrady. Agenttik Eýropalyq habar taratý odaǵynyń múshesi bolǵandyqtan, Qazaqstan Balalar Eurovision baıqaýynyń qatysýshysy atandy. Elimizdiń namysyn bıyl Erjan Maksım qorǵaıdy», - dedi Agenttik tóraǵasy.

Sondaı-aq, «Habar» jańa telejúrgizýshilerdi tabý maqsatynda Live formatynda jalpyrespýblıkalyq kastıng júrgizedi. Tilek bildirýshiler áleýmettik jelide ózderin kórsetýi tıis.

Eske sala ketsek, QR Prezıdenti Teleradıo kesheniniń bas dırektory bolǵan Erlan Bekhojın tamyz aıynda «Habar» Agenttigi» AQ Basqarma tóraǵasy bolyp taǵaıyndalǵan edi. «Habar» Agenttigi quramynda respýblıkalyq «Habar» men «Habar 24», «Kazakh TV» jáne «EL ARNA» telearnalary bar.