Ermıtaj Aleksandr Nevskıı mazarynyń kóshirmesin 330 mıllıonǵa baǵalady
ASTANA. 25 jeltoqsan. QazAqparat - Memlekettik Ermıtajǵa Aleksandr Nevskıı mazarynyń kóshirmesin jasaý úshin 330 mıllıon rýbl kerek.
Bul týraly keshe, 24 jeltoqsan kúni bolǵan baspasóz konferentsııasynda murajaı dırektory Mıhaıl Pıotrovskıı málim etti, dep habarlaıdy «Interfaks» agenttigi. Ol metsenattardyń qarjylaı kómegine ıek artyp otyr.
Qazirgi ýaqytta Aleksandr Nevskıı mazarynyń túp nusqasy qaıta jańǵyrtylyp jatyr. Jumystar 2014 jylǵa qaraı aıaqtalýy tıis, odan keıin Ermıtaj kóshirmeni daıyndaýǵa kirisýge ázir, alaıda oǵan qarjy joq.
Eske sala ketsek, Aleksandr Nevskıı mazarynyń kesheni 18-ǵasyrdaǵy Reseıdiń dekoratıvti-qoldanbaly óneriniń eskertkishterine jatady. 1753 jyly salynǵannan keıin mazar Aleksandr-Nevskıı lavrynda bolǵan, al 1922 jyly ony Ermıtajǵa tapsyrǵan.
