Ermekbaev: Teris dinı aǵymdar qyzmetine tosqaýyl qoıý - din salasyndaǵy saıasattyń mańyzdy baǵyty

ASTANA. QazAqparat - Búgin QR Din isteri jáne azamattyq qoǵam mınıstri Nurlan Ermekbaev Qazaqstan musylmandary dinı basqarmasynyń tóraǵasy, Bas múftı Serikbaı qajy Orazben kezdesý ótkizdi.

Bul týraly QR Din isteri jáne azamattyq qoǵam mınıstrliginiń baspasóz qyzmetinen habarlady.

Kezdesý barysynda dinı qyzmet salasyndaǵy zańnama normalaryn turǵyndar arasynda túsindirý jáne dinı radıkalızmge qarsy birlesken jumysty jandandyrýǵa qatysty ýákiletti organ men QMDB arasyndaǵy yntymaqtastyq máseleleri talqylandy.

Nurlan Ermekbaev radıkaldy dinı aǵymdy ustanýshylarmen arnaıy túsindirý jumystaryn júrgizýdiń jańa mehanızmin júzege asyrý qajettigine nazar aýdardy.

«Teris dinı aǵymdar qyzmetine tosqaýyl qoıý - din salasyndaǵy saıasatymyzdyń mańyzdy baǵyty. Elbasy aıtqandaı, biz kez-kelgen dinı radıkalızmge múldem tózbeýshilikti qalyptastyrýymyz kerek. Bul úlken jaýapkershilik arttyrady», - dedi mınıstr.

Sonymen qatar, kezdesýde QR Din isteri jáne azamattyq qoǵam mınıstrligi men Qazaqstan musylmandary dinı basqarmasy arasyndaǵy ózara yntymaqtastyq týraly kelisim aıasynda birlesken jumystyń jalǵasyn tabatyndyǵy aıtyldy.

Aqparattyq-túsindirý jumystaryn jetildirý, ımamdardy daıarlaý deńgeıin kóterý, dinı ǵımarattardyń qurylysyn salýda jáne kadrlyq saıasatta júıeli jáne oılastyrylǵan jumystyń qajettigi ataldy.

Kezdesý qorytyndysynda taraptar elimizdegi dinı turaqtylyq pen kelisimdi saqtaýdaǵy jumystardy jandandyrýda birlesken is-qımyldyń erekshe mańyzdy ekenin atady.