Ermekbaev Taıjanǵa: Meshitte orys tilinde ýaǵyz aıtý - túpkilikti sheshim emes
ASTANA. QazAqparat - Meshitte orys tilinde ýaǵyz oqý máselesi túpkili qabyldanǵan sheshim emes. Bul týraly búgin elordada ótken «Qazirgi kezeńdegi ekstremızm men terrorızmniń aldyn alý men jolyn kesýdiń zańnamalyq jáne ınstıtýtsıonaldyq sharalary» taqyrybyndaǵy dóńgelek ústel otyrysy aıasynda BAQ ókilderine suhbat bergen QR Din isteri jáne azamattyq qoǵam mınıstri Nurlan Ermekbaev aıtty.
«Qoǵamda qandaı másele kóterilse, biz sol máseleni qarastyrýymyz kerek. Qazir qoǵamda bul másele kóterilip otyr. Sebebi qazir kóptegen meshitke jastarmen qatar úlken kisiler de kelýde. Olardyń qatarynda qala, aýyl turǵyndary da bar. Olardyń kóbi ımamdardyń qazaq, arab tilinde oqıtyn ýaǵyzdaryn túsinbeıdi. Tek qalalyq turǵyndar emes, aýyldan kelgen jastar da túsinbeı jatady»,- dedi mınıstr.
N.Ermekbaevtyń túsindirýinshe, oǵan dinı til men turmystyq tildiń eki bólek bolýy sebep bolyp otyr.
«Sondyqtan dinı tildi oqý qajet. Al qazaqsha túsinbeıtinder qaıda barady? Olardyń dinge degen qyzyǵýshylyǵy bar, túsingisi keledi. Biraq, meshitterde aıtylyp jatqan máselelerdi túsinbese olar destrýktıvti aǵymdardyń ókilderine barýǵa májbúr. Ondaı aǵymdardyń belsendileri qazaqsha da, oryssha da sóıleı beredi, jastardy ózderine tartyp alady. Ózderińiz aıtyńyzdarshy, bul qoǵamǵa jaqsy ma, jaman ba? Jaqsy emes. Sondyqtan Qazaqstan musylmandary dinı basqarmasynyń resmı, jaqsy bilim alǵan ımamdary jastarǵa, basqa da zamattarǵa ózderiniń oılaryn, pikirin jetkizýin qamtamasyz etýimiz kerek. Sol sebepti bul másele kóterilip jatyr. Meshitterge tek qazaqtar emes basqa da ulttardyń ókilderi kelip, ıslam dinin túsingileri keledi. Osyǵan oraı bul máseleni qarastyryp jatyrmyz. Biraq, sheshim qabyldanǵan joq. Múmkin keıbir óńirlerde bolyp qalar. Barlyq jerde engizý qajet dep eshkim aıtqan joq», - N.Ermekbaev.
