Ermekbaev: Din negizinde saıası partııa qurýǵa talpynǵandar boldy

ASTANA. QazAqparat - Kezinde dindi saıası maqsattarda paıdalaný úshin áreketter de jasaldy. Bul týraly Senattaǵy «Dinı qyzmet jáne dinı birlestikter týraly» QR Zańyn iske asyrý barysyna arnalǵan dóńgelek ústelde QR Din isteri jáne azamattyq qoǵam mınıstri Nurlan Ermekbaev málim etti, dep habarlaıdy QazAqparat.

Táýelsizdiktiń alǵashqy jyldarynda dinshildikke jol ashylǵanyna toqtalǵan mınıstr, «Dinı senim bostandyǵy jáne dinı birlestikter týraly» 1992 jylǵy Zań dindi nasıhattaýǵa sheksiz múmkindikter bergen. Máselen, ol kezde dinı birlestik qurý úshin on adam jetkilikti bolatyn», -dedi.

Onyń sózine qaraǵanda, jıyrma jyldyń ishinde dinı uıymdardyń sany 7 esege artty. Sheteldik mıssıonerlerdiń yqpaly kúsheıdi. Zańsyz dinı qyzmettiń kórsetkishteri jyl saıyn ósip otyrdy.  Radıkaldy ıslamnyń alǵashqy ókilderi paıda bola bastady. Konfessııalar arasynda qarama-qaıshy baqtalastyq kúsheıe tústi.  Óz dinin kúshtep tańý faktileri jıilep ketti.

«Tipti dindi saıası maqsattarda paıdalaný úshin áreketter de jasaldy. Mysal úshin ıslam negizinde saıası partııa qurýǵa nıettendi bir top azamattar. Osyndaı jaǵdaılarda 2011 jyly «Dinı qyzmet jáne dinı birlestikter týraly» jańa Zań qabyldandy. Bul Zań dinı qyzmetti quqyqtyq retteýdiń birqatar mańyzdy aspektilerin belgilep berdi.  Dinı salada negatıvti kórinisterdiń múmkindikterin shektep, dinı qyzmet protsesterin bir tártipke keltirdi», - dedi Nurlan Ermekbaev.