Ermek Tursynovtyń «Jat» fılmi Oskarǵa usynylady
ASTANA. QazAqparat - Qazaqstandyq rejısser Ermek Tursynov túsirgen «Jat» fılminiń álemdik premerasy qyrkúıek aıynyń ortasynda Torontodaǵy halyqaralyq kınofestıvalde (Toronto International Film Festival) ótetin bolady.
«Jat» fılminiń túsirilimi ótken jyly aıaqtalǵan bolatyn. Kınokartına ómirde bolǵan oqıǵalarǵa negizdelgen, onda 30-jyldary ómirden baz keship, taýda ǵumyr keshýge ketip qalǵan Іlııas esimdi er adamnyń basynan keshken oqıǵalary baıandalady, dep jazady baistars.kz.
Fılm prodıýsseri Qanat Tórebaı baıqaýda «kınomotografııa óneri men ǵylymdar akademııasy» nomınatsııa syılyǵyna nıetti ekenin habarlaǵan bolatyn.
"Torontoda ótkeli otyrǵan bul baıqaýǵa qatysý biz úshin úlken qýanysh. Bul baıqaýǵa qatysý odan keıingi Oskar syılyǵyn alýǵa úmitimizdi arttyrady", - deıdi ol.
Aıta keteıik, fılmniń stsenarıı avtory jáne rejısseri - Ermek Tursynov. Qoıýshy-operator Murat Álıev, qoıýshy-sýretshi - Aleksandr Rorokın, kompozıtor - Qýat Shildebaev. Basty rólderdi Erjan Nurymbet, Elına Abaıqyzy, Qýandyq Qystyqbaev, Aleksandr Karpov, Roza Haırýllına, Erbolat Toǵyzaqov somdaıdy.
Esterińizge salsaq, «Jat» fılmi - Dolby Atmos kóparnaly dybystyq formatynda túsirilgen alǵashqy qazaqstandyq kınotýyndy. Kartınany daıyndaýshylardyń sózine qaraǵanda, fılmdi túsirýge kásipker dostary demeýshilik kórsetken.
2013 jyly Qazaqstan atynan Oskarǵa «Shal» fılmi usynyldy.
