Ermek Tursynovtyń jańa fılmi prokatqa shyǵady
ASTANA. QazAqparat - Rejısser Ermek Tursynov óziniń «Kempir» atty jańa fılmin túsirip boldy. Komedııa janryndaǵy týyndy 20 naýryzda kórermenderge jol tartady, dep habarlaıdy Meloman.kz.
Birneshe dramalyq lentalardan keıin («Kelin», «Shal») Tursynov Qazaqstan naryǵyna kóńildirek shyǵarma túsirýge maqsat tutqan sekildi. «Kempir» týyndysy Qaıyrǵalı men Kúlpásh esimdi qos qarııa týraly.
Fılmniń stsenarıin Tursynovtyń ózi jazǵan. Rejısserdiń aıtýynsha, bul komedııada turpaıy, uıatsyz jerler bolmaıdy, qaıta qazaqtyń «halyqtyq komedııasyna» aınalady.
Basty rólderdi «Tamasha» teatrynyń múshesi Qadyrbek Demesin men tanymal aktrısa Ǵazıza Ábdinábıeva somdaıdy. Sonymen qatar, fılm jumysyna Asanáli Áshimov pen Erbolat Toǵyzaqov syndy akterler qatysyp otyr. Almaty qalasy men Almaty oblysynda túsirilgen fılmniń mýzykasyn Qýat Shildebaev jazypty.
