Ermek Tursynov «Kelin» men «Shaldyń» sońǵy bólimi «Kenje» fılmin prokatqa shyǵarady
ASTANA. QazAqparat - 2 sáýir kúni tanymal qazaq rejısseri Ermek Tursynovtyń «Kenje» fılmi jalpyulttyq prokatqa shyǵady. Bul týraly búgin Astanada arnaıy baspasóz máslıhatynda Ermek Tursynov málim etti.
«Kenje» - rejısserdiń quramyna «Kelin», «Shal» fılmderi kiretin trılogııasynyń sońǵy bólimi. Týyndy Taılandta jáne Ispanııanyń Malorka aralynda túsirildi. Oǵan Vengrııa, Reseı, AQSh kásipqoılarynan turatyn túsirý komandasy tartylǵan bolatyn. Trıýkterdi Jaıdarbek Kúnqojınovtiń «Nomad» kaskaderleri jasady. Basty rolderdi Jandos Aıbasov pen Aınur Nııazova oınady.
Kartınadan Olga Zaıtseva, Mıhaıl Hmýrov, Edýard Ońdar sııaqty Reseı akterlerin de kórýge bolady. «Akterlerdi tańdaý eki jyl buryn bastalǵan bolatyn. Rolge sáıkes keletin shyn sheberlerdi tabý qıyn boldy. Basty keıipkerge biz jandy, kózinde bar ómiri tunyp turǵan naǵyz erdi tabýǵa tyrystyq. Bastysy - elge tanylǵan akter bolmaýy kerek edi. Men juldyz akterlermen jumys isteýge qumar emespin. Menińshe, Jandos soǵan laıyq boldy», - deıdi E.Tursynov.
«Bul kartına trılogııanyń úshinshi bólimi. Aldynda «Kelin», «Shal» túsirilgeni málim. Trılogııa 7 jyl boıy túsirildi. Atalǵan týyndy - bir jobanyń sońǵy shyǵarylym, árıne ol aldyndaǵy úsh fılmnen tipti ózgeshe. Bul - janrlyq kıno, ekshn elementteri bar drama. Kórermenderge ol qanshalyqty unaıtyndyǵyn bilmeımin. Menińshe, ol erekshe bolady. Oǵan 16 eldiń ókilderi at salysty. Semka óte aýqymdy boldy, shetelde Ispanııada, Taılandta ótti. Barlyq topqa rızashylyǵymdy bildirgim keledi», - deıdi rejısser.
«Kenje» ata-anasynan erte aıyrylǵan aǵaıyndylar týraly. Balalar úıine ornalastyrylatyndaryn sezgen baýyrlar erterek qamdanyp, qalaǵa qashyp shyǵady. Ár jumysqa jaldanyp, nápaqa tabýǵa kirisken aǵaıyndylar óse kele kisi óltirýge tapsyrys qabyldap, tabys taba bastaıdy. Artynsha olar bul shaıqastan aman shyǵý múmkin emes ekendigin biledi.
