Ermek Serkebaevtyń murasyn túgendegen kitaptyń jańa basylymy jaryq kórdi
ASTANA. KAZINFORM — Ermek Serkebaevtyń 100 jyldyǵyna oraı ánshiniń ómiri men shyǵarmashylyǵy týraly kitaptyń jańa nusqadaǵy basylymy tanystyryldy.
Abaı atyndaǵy Qazaq ulttyq opera jáne balet teatrynda Irına Serkebaeva kórnekti ánshi Ermek Serkebaevtyń týǵanyna 100 jyl tolýyna oraı jaryq kórgen «Ermek Serkebaev. I jızn, ı molodost, ı schaste. Novye stranıtsy» kitabynyń ekinshi basylymyn tanystyrdy.
Avtor Qazaqstannyń halyq ártisi, kórnekti opera ánshisi Ermek Serkebaevtyń ómiri men shyǵarmashylyǵyna qatysty jańa derektermen kitap mazmunyn tolyqtyrǵan. Týyndynyń alǵashqy basylymy 2009 jyly jaryq kórgen.
Ekinshi basylymda Ermek Serkebaevtyń ómiri men shyǵarmashylyǵy týraly tyń derekter qamtylǵan. Kitapqa óner ıesi ómir súrgen kezeń, ustazdary, kameralyq mýzyka, qazaqtyń halyq ánderi týraly jańa bólimder engizildi. Sondaı-aq ánshiniń dıskografııasy usynylǵan. Kitap Serkebaevtar, Qorǵanovtar-Shamaro jáne Brıýkner áýletteriniń jeke muraǵattary men estelikteri negizinde daıyndalǵan.
Jańa basylymdy ázirleý barysynda ánshiniń ustazdarynyń ómir joly da qosymsha zertteldi. Tanystyrylym kezinde Irına Serkebaeva jeke jáne otbasylyq muraǵattaǵy biregeı fotosýretterdi, aýdıo jáne beınematerıaldardy kópshilik nazaryna usyndy. Bul materıaldar Ermek Serkebaevtyń balalyq jáne jastyq shaǵynan bastap, ónerdegi alǵashqy qadamdary men shyǵarmashylyq bıikterge kóterilgen kezeńderine deıingi ómir jolyn tanystyrady.
Keshte Ermek Serkebaevtyń zamandastary, áriptesteri men shákirtteri ánshi týraly estelikterin bólisti. Teatr ártisteri mýzykalyq baǵdarlama usynyp, oǵan Qazaqstannyń halyq ártisi Shahımardan Ábilov pen Qazaqstan Respýblıkasynyń eńbek sińirgen qaıratkeri Jámılá Serkebaeva da qatysty.
Eske salaıyq, buǵan deıin Astanada Qazaqstannyń halyq ártisi, kórnekti opera ánshisi Ermek Serkebaevtyń týǵanyna 100 jyl tolýyna arnalǵan «Ǵasyr daýysy» atty mereıtoılyq mýzykalyq kesh ótti. Memleket basshysy Qasym-Jomart Toqaev kontsert qatysýshylaryna quttyqtaý joldaǵan edi.
