Ermek Saǵymbaev memleketke syrttan tónýi múmkin qaterlerdi aıtty
ASTANA. KAZINFORM – Ulttyq qaýipsizdik komıtetiniń basshysy Ermek Saǵymbaev memleketke syrttan tónýi múmkin qaterler týraly aıtty.
«Bizdiń mamyr aıynda bolǵan Bishkektegi sońǵy kezdesýimizden beri salystyrmaly túrde kóp ýaqyt ótken joq. Alaıda osy kezeńde TMD-da, jalpy álemde bolǵan oqıǵalar bizdiń eldegi operatıvti jaǵdaıǵa aıtarlyqtaı áserin tıgizip otyr. Halyqaralyq terrorızmge qarsy belsendi áreket etýmen baılanysty mindetter birinshi orynda qalyp otyr», - dedi Ermek Saǵymbaev TMD elderi qaýipsizdik organdary men arnaýly qyzmetteri basshylary keńesiniń 55-shi otyrysynda.
Sondaı-aq, ol uıym elderi sıntetıkalyq esirtki saýdasyna kóbirek mán berý kerektigin atap ótti.
«Transshekaralyq qylmystardyń, zańsyz kóshi-qon men qarý-jaraq kontrabandasynyń qateri artyp tur. Esirtki trafıgine, ásirese «sıntetıka» delinip júrgen esirtki túriniń taralýy bizdiń muqııat nazar aýdarýymyzdy qajet etedi», - dedi UQK basshysy.
Aıta keteıik, Prezıdent TMD-ǵa múshe memleketterdiń qaýipsizdik organdary men arnaýly qyzmetteriniń basshylaryn qabyldady.
