Ermek Musaınov: Qarsylastardyń deńgeıi joǵary, namysty qoldan bermeýge tyrysamyz

HARBIN. KAZINFORM – Kerlıngten Qazaqstan quramasynyń sportshysy Ermek Musaınov Kazinform tilshisine eksklıýzıv suhbat birip, Harbın qalasynda ótip jatqan qysqy Azııa oıyndary týraly oıymen bólisti.

Musaınov búgingi Fılıppınmen oıyn tartysty ótkenin aıtty. 

– Oıyn óte qıyn jáne tartysty ótti. Alaıda, qarsylastyń sheberligi basym boldy. Biz oıyn tizginin óz qolymyzǵa alýǵa tyrystyq. Jaqsy oıyn kórsettik, biz jeńilgen joqpyz, namysty qoldan bermedik. Endi myqty bolyp oralamyz dep oılaımyn, - dedi sportshy.

Ermek Musaınovtyń aıtýynsha, Harbındegi qysqy Azıada onyń alǵashqy halqaralyq deńgeıdegi jarysy. 

– Negizi men quramamen alǵash ret halqaralyq deńgeıdegi iri jarysqa qatysyp otyrmyn. Sondyqtan psıhologııalyq jaǵynan qıyndaý boldy. Alaıda, komandanyń qoldaýy maǵan kúsh berdi, ózime degen senimimdi arttyrdy, - deıdi ol.

Sportshy quramanyń aldaǵy oıyndary týraly aıtyp, pleı-offqa shyǵý múmkindigin atady.

- Kelesi joly eń myqty qarsylastardyń biri Ońtústik Koreıamen oınaımyz. Biz úshin ońaı bolmaıtyny anyq. Alaıda, ár oıynǵa jaýapkershilikpen qarap, bar kúshimizdi salamyz. Odan keıin Qyrǵyzstan quramasy bar. Pleı-offqa shyǵý úshin bizge bir jeńis kerek, - dedi Ermek.

Sońynda sportshy qazaqstandyqtarǵa sálem joldap, qoldaý surady. 

– Barsha qazaqstandyqtarǵa duǵaı sálem joldaımyz. Bizdi qoldap, bizge jankúıer bolyńyzdar. Sizderdiń qoldaýlaryńyz biz úshin óte mańyzdy, - deıdi Ermek Musaınov.

Aıta keteıik, Kerlıngten Qazaqstan erler quramasy qysqy Azııa oıyndarynyń alǵashqy oıynynda Qytaılyq Taıbeıdi 10:5 esebimen jeńdi.

Búgin, el quramasy Fılıppınmen synǵa túsip, 1:4 esebimen jol berdi. Jigitter alǵashqy 7 kezeńde laıyqty qarsylyq kórsetkenimen, Fılıppın quramasy sońǵy kezeńde 2 upaı enshilep ketti.

Osyǵan deıin habarlaǵanymyzdaı, qyzdar quramasy qytaılyq Taıbeıdi 14:0 esebimen qapy qaldyrdy.