Ermek Marjyqpaevqa Kókshetaýda sport nysandaryn salý jobasy tanystyryldy
KÓKShETAÝ. QazAqparat - Aqmola oblysynyń ákimi Ermek Marjyqpaev sporttyq nysandardy jobalap, salýmen aınalysatyn «VVP Company» kompanııasynyń ókilderimen kezdesti, dep habarlaıdy QazAqparat tilshisi ákimdiktiń baspasóz qyzmetine silteme jasap.
Vedomstvonyń málimetinshe, kompanııa ókili Jaqsylyq Ótegenov aımaq basshysyna oblys ortalyǵynda salynatyn sporttyq nysandardyń jobasyn tanystyrdy.
Onyń biri - aýmaǵy 5-8 gektardy quraıtyn kópbeıindi sport keshenin memlekettik- jekeshelik áriptestik aıasynda salý qarastyrylyp otyr. Jobany 2-3 jyl ishinde júzege asyrý josparlanǵan.
Ekinshi joba standartty stadıon. Onda jyl boıyna jattyǵý ótkizýge bolady. Nysandy ınvestorlar kóktemde bastaýǵa daıyn.
Ermek Marjyqpaev Kókshetaý qalasynyń ákimi Amangeldy Smaıylov pen oblystyq dene shynyqtyrý jáne sport basqarmasynyń basshysy Áset Búkibaevqa usynysty zerttep, jer telimin qarastyrýdy tapsyrdy.
«Jobanyń áleýmettik mańyzy zor. Bizdiń qalamyzda fýtbol alańdary jetispeıdi. Tipti , keıbir adamdar fýtzalda túnge deıin daıyndalady. Sondyqtan, bul máseleni aldaǵy ýaqytta sheshý qajet. Shaǵyn sport nysanynan bastaıtyn bolamyz», – dep atap ótti aımaq basshysy.
