Ermek Marjyqpaev «Ushqyn - Kókshetaý» voleıbol komandasynyń basshylyǵymen kezdesti
KÓKShETAÝ. QazAqparat – Aqmola oblysynyń ákimi Ermek Marjyqpaev oblystyq voleıbol federatsııasynyń ókilderi jáne «Ushqyn - Kókshetaý» kásibı voleıbol komandasynyń jattyqtyrýshylarymen kezdesti, dep habarlaıdy QazAqparat tilshisi ákimdiktiń baspasóz qyzmetine silteme jasap.
Kezdesýde aımaq basshysy oblystyq voleıbol federatsııasynyń prezıdenti bolyp saılanǵan M.Syrlybaevty jáne «Ushqyn - Kókshetaý» voleıbol komandasynyń bas jattyqtyrýshysy V.Osıpovty quttyqtap, aldaǵy qyzmetterine sáttilik tiledi.
Aıta keteıik, komanda jattyqtyrýshysy V.Osıpov Ýkraınadan shaqyrylǵan, ol jaqta «Dnepr» MVK jáne ulttyq quramany jattyqtyrǵan.
Ermek Marjyqpaev óńirde halyq sanynyń azdyǵyna qaramastan, aýdandardaǵy 10 sport mektebinde 500-ge jýyq bala voleıbolmen aınalysatynyn atap ótti. Jasóspirimderdiń arasynan negizgi komandaǵa oıynshalardy tańdaý boıynsha irikteý jumystaryn júrgizý qajettigin aıtty. Sondaı-aq, jańa jattyqtyrýshynyń kelýimen jerlesterimizdiń jeńis tuǵyrynan kórinýine tilektestigin bildirdi. V.Osıpovtyń komanda jáne aldaǵy josparlary týraly pikirin surap bildi.
«Komandanyń jeńiske degen jigeri mol. Maǵan oıynshylardyń sońyna deıin kúresetini unady. Búgingi qol jetkizgen jetistikerimizdi odan ári nyǵaıtyp, Ulttyq lıganyń joǵary lıgasyna shyǵyp, óner kórsetý», - dedi V.Osıpov óz sózinde.
Aımaq basshysy óńirde sportty damytýǵa bıýdjetten bólingen qarjyny maqsatty paıdalaný qajettigin, qajet bolyp jatsa, qosymsha qarjy bólinetinin atap ótti.
«Komanda da turaqtylyq bolmasa, oıynshylardyń jeńiske degen jigeri bolmaıdy. Bizdiń basty maqsatymyz komandany qoldap, qajetilikterimen qamtamasyz etý, sonda ǵana sportshylardyń jeńiske jetýine jaǵdaı jasalady. Voleıboldan Ulttyq lıgadaǵy komandalar arasyndaǵy QR 28-shi chempıonatynyń besinshi týryn Kóshetaýda ótkizý týraly usynys jasaıyq. Bul Aqmola oblysynda voleıboldyń damýyna zor septigin tıgizer edi. Meniń oıymsha, komandanyń oıyndaryn durys uıymdastyratyn bolsaq, óńirde bul sport túri fýtbolmen jáne hokkeımen salystyrǵanda tanymaldylyǵy arta túsetini anyq. Komandanyń jeńisi birinshi kezekte jattyqtyrýshyǵa baılanysty, sondyqtan oǵan eshkim kedergi keltirmeýi tıis», - dedi E.Marjyqpaev.
Aımaq basshysy oblystyq voleıbol federatsııasynyń prezıdentine aýdandardaǵy sport mektepteriniń qazirgi jaǵdaıymen tanysyp, oryn alǵan máselelerdi biliýdi tapsyrdy.
Eske sala keteıik, «Ushqyn - Kókshetaý» voleıbol komandasy 2019 jyly qurylǵan bolatyn. Qazirgi tańda voleıboldan QR chempıonatynyń ekinshi týry boıynsha Joǵary lıgadaǵy erler komandasy kósh bastap tur.
Aslan Ospanov.
