Ermek Marjyqpaev tikeleı qarym-qatynas formatynda «Investor saǵatyn» ótkizdi
KÓKShETAÝ. QazAqparat - Aqmola oblysynyń əkimi Ermek Marjyqpaev tikeleı qarym-qatynas formatynda «Investor saǵatyn» ótkizip, kásipkerlerdi qabyldady, dep habarlaıdy QazAqparat tilshisi ákimdiktiń baspasóz qyzmetine silteme jasap.
«Galstýksiz» kezdesýde áleýetti ınvestorlar men kásipkerler aımaq basshysyna óz jobalaryn usynyp, aldaǵy josparlarymen bólisti, sondaı-aq, tolǵandyrǵan saýaldaryn qoıyp, jaýap aldy.
«Bul jolǵy kezdesý burynǵydan ózgeshe, bılik pen bıznes ókilderi tikeleı sóılese aldy. Aýdan ákimderi men salalyq basqarmalardyń basshylary keıbir suraqtardy osy jerde sheshti», deıdi oblys ákimdiginiń baspasóz qyzmetindegiler.
Kezdesýde Arshaly aýdanynda qýaty 100 Mvt quraıtyn jel elektr stantsııasyn salý jobasy qoldaý tapty. Bul jobany «Borey Energo» seriktestigi júzege asyrady, qytaılyq ınvestordy tartýdy josparlap otyr. Túrkııalyq ınvestor – «Grın Valeı» kompanııasy Kókshetaý qalasynda táýligine 200 tonna zyǵyr óńdeý boıynsha jobany qolǵa almaqshy.
«Kusto Energy» kompanııasy Makınsk qus fabrıkasy men Býrabaı aýdanyndaǵy «KazBeef» seriktestigi úshin bıogaz zaýytyn salmaq nıette. Kompanııa energetıkamen baılanysty jobalarmen aınalysady. Búgingi kúni onyń qurylys tehnologııasy men ekologııalyq taza elektr energııasyn, jylý, gaz jəne organıkalyq tyńaıtqysh óndiretin zaýyttary bar. Jalpy, jańa dıalog alańynda ár óńir men saladan 20-dan astam joba tanystyryldy. Sonymen qatar, týrızm, aýyl sharýashylyǵy, medıtsına salasyndaǵy jobalar talqylandy.
«Mundaı kezdesýlerdi aldaǵy ýaqytta jıi ótkizip turýdy josparlap otyrmyz. Jańa formattaǵy kezdesý bılik pen bıznes ókilderiniń tikeleı qarym-qatynas arqyly naqtyly máselelerdi kóterip, jedel sheshýge sondaı-aq, óńirdiń ınvestıtsııalyq klımatyn jaqsartýǵa múmkindik beredi», - dep atap ótti Ermek Marjyqpaev.
Kezdesý qorytyndysy boıynsha taraptar árbir kásiporynnyń máselesin jaýapty memlekettik organdy bekitý arqyly sheshý úshin Jol kartasyn ázirleý jóninde kelisimge keldi.
«Aımaq basshysy ár aı saıyn «Atameken» óńirlik kásipkerler palatasynda «Business time» - «Bıznes ýaqyty» formatynda osyndaı kezdesýlerdi ótkizýdi usyndy. Keler joly agroónerkásip keshenin damytý taqyryby qaýzalatyn bolady. Oblys ákiminiń bıznesmendermen osyndaı formatta kezdesýi oryn alǵan máselelerdi jedel sheshýge múmkindik týǵyzady», - deıdi óńirlik kásipkerler palatasy dırektory Tımýr Nahıpbekov.
Kezdesýde aımaq basshysyna kásipkerlerge qoldaý kórsetý ortalyǵy, kovorkıng-aımaq, sondaı-aq, bızneske qyzmet kórsetetin «ATAMEKEN SERVICES» servısi tanystyryldy.
