Ermek Marjyqpaev: Óńirden 2 mln tonnadan astam astyq eksporttalady
NUR-SULTAN. QazAqparat – Aqmola oblysy jyl saıyn 2 mln tonnadan astam astyq eksporttaıdy. Bul týraly óńir ákimi Ermek Marjyqpaev málim etti, dep habarlaıdy QazAqparat tilshisi.
«Bizdiń oblys negizgi aýyl sharýashylyǵy óńirleriniń biri ekeni belgili. Osy oraıda eldiń aýyl sharýashylyǵy jalpy ónimindegi úlesi 11 paıyz deńgeıinde. Óńirimiz Qazaqstanda ósiriletin astyqtyń tórtten bir bóligin óndiredi jáne bıdaıymyz álemdik naryqta joǵary baǵalanyp otyr. Atap aıtqanda, jyl saıyn álemniń 30 eline 2 mln tonnadan astam eksporttalyp keledi», - dedi ákim Ortalyq kommýnıkatsııalar qyzmetinde.
Onyń aıtýynsha, kóktemgi egin egý naýqany óńirde ońtaıly agrotehnıkalyq merzimde aıaqtaldy. Astyq jáne dándi-burshaqty daqyldary 4,5 mln gektarǵa, maıly daqyldar – 227 myń gektarǵa, jemshóp 190 myń gektarǵa sebildi. Sonymen qatar, kartop 21 myń gektar alqapta, kókónis 3,5 myń gektarda egildi.
«Sýarmaly egister alqabyn keńeıtý júrip jatyr. Onyń aýmaǵy 30 myń gektarǵa deıin jetkizildi», - dedi Ermek Marjyqpaev.
