Ermek Marjyqpaev: Ómir súrý sapasyn arttyrý – basty mindet
KÓKShETAÝ. QazAqparat – Aqmola oblysynyń ákimi Ermek Marjyqpaev Úkimettiń keńeıtilgen otyrysynda alǵa qoıǵan mindetterdi talqylaý boıynsha ótken oblys aktıvi jınalysyn ótkizdi, dep habarlaıdy QazAqparat tilshisi oblystyq ishki saıasat basqarmasyna silteme jasap.
Jıynda oblys ákimi óńirdegi birinshi jartyjyldyqta halyqtyń tabysyn arttyrý jáne ómir súrý sapasyn jaqsartý boıynsha atqarylyp jatqan jumystar týraly aıtty.
«5 600 jumys berýshi eń tómengi eńbekaqy alatyn jumysshylardyń aılyǵyn 15-40 paıyzǵa arttyrdy. Bul ıaǵnı, kásiporyndardaǵy 39 myń jumysshy. Jalpy, bıýdjet mekemelerindegi tómen eńbekaqy alatyn 32 myń jumysshynyń aılyǵy ortasha 35 paıyzǵa ósti. Maýsymnyń 1-nen bastap, bıýdjettik mekemede eńbek etetin 56 myń jumysshynyń eńbekaqysy 30 paıyzǵa kóterildi», - dep atap ótti aımaq basshysy.
Ermek Marjyqpaevtyń aıtýynsha, oblysta baspanamen qamtý, aýyl jáne qala ınfraqurylymyn damytý máseleleri birtindep sheshilip jatyr.
«Nurly jer» baǵdarlamasy boıynsha kóppáterli 35 turǵyn úıdiń salynyp jatyr. 2019 jyly 5 myńnan astam páter qurylysy aıaqtalýy tıis bolsa, qazir olardyń 2,3 myńnan astamy paıdalanýǵa berilgen.
«Bıylǵy jyly halyqty áleýmettik jaǵynan osal toptaryna jaldamaly páter qorynan 526 páter bólý josparlanǵan bolsa, qazir kópbalaly jáne ózge sanattaǵy barlyǵy 195 otbasy baspanaly boldy», dep túıindedi aımaq basshysy.
