Ermek Marjyqpaev: qyzmetkerleriniń jemqorlyǵy úshin basshylary jaýapqa tartylady

KÓKShETAÝ. QazAqparat – Aqmola oblysy ákiminiń tóraǵalyǵymen selektorly rejımde ákimdik májilisi ótip, onda qol astyndaǵy qyzmetkerlerdiń jemqorlyǵy úshin memlekettik organdardyń birinshi basshylarynyń jaýapkershiligi qaraldy, dep habarlaıdy QazAqparat tilshisi oblystyq ishki saıasat basqarmasyna silteme jasap.

Aımaq basshysy atap ótkendeı, Memleket basshysy sybaılas jemqorlyqqa qarsy kúreste naqty basymdyqtar qoıdy. Zańnyń qabyldanýymen elimizde sybaılas jemqorlyqqa qarsy is-qımyldyń jańa kezeńi bastalady. Alǵash ret basshylardyń baǵynyshtylarǵa jaýapkershiligi zańnamalyq deńgeıde bekitilgen. Bul norma Qazaqstan Respýblıkasynyń Prezıdenti Qasym-Jomart Toqaevtyń tikeleı tapsyrmasy boıynsha zańǵa engizilgen.

«Tuńǵysh ret basshylardyń baǵynyshty qyzmetkerleri úshin jaýapkershiligi zańnamalyq deńgeıde bekitilgen. Budan bylaı, saıası memlekettik qyzmetshiler olardyń tikeleı qaramaǵyndaǵy qyzmetkerleri sybaılas jemqorlyq quqyq buzýshylyq jasasa mindetti túrde otstavkaǵa shyǵýǵa suranýy kerek. Birinshi basshy onyń tikeleı baǵynyshty tulǵasyna qatysty sottyń aıyptaý úkimi kúshine engennen soń kúntizbelik 10 kún ishinde nemese aqtalmaıtyn negizder boıynsha qylmystyq is toqtatylǵannan keıin otstavkaǵa ketýge mindetti.

Al saıası emes, biraq A jáne B korpýsynyń ákimshilik memlekettik qyzmetshileri bolyp tabylatyn barlyq basqa basshylarǵa tártiptik jaýapkershilik qarastyrylǵan», - dep atap ótti Ermek Marjyqpaev.

Keńes sońynda oblys ákimi Memlekettik organdardyń barlyq basshylaryna, ásirese tótenshe jaǵdaı rejıminde olardyń jeke jaýapkershiligi týraly eskertti.

Aıta ketý kerek, bıýdjet qarajatyn maqsatty jumsaýǵa, eńbek ujymdaryndaǵy sybaılas jemqorlyqty joıýǵa, sondaı-aq parasattylyq qaǵıdattaryn engizýge erekshe nazar aýdaryldy.