Ermek Marjyqpaev Kókshetaýdyń basty shyrshasynyń shamyn jaǵý rásimine qatysty
KÓKShETAÝ. QazAqparat – Kókshetaýda Jańa jyldyq basty shyrshanyń shamdary jaǵyldy, dep habarlaıdy QazAqparat tilshisi.
Abylaı han alańynda ótken sharaǵa Aqmola oblysynyń ákimi Ermek Marjyqpaev qatysyp, jınalǵan qaýymdy alda kele jatqan merekemen quttyqtap, jaqsylyq, baqyt tiledi.
Kókshetaý qalasynyń ortalyǵynda qurylǵan shyrsha men onyń aınalasyndaǵy muz qalashyǵy bıylǵy jyly erekshe dızaınmen jasalǵan. Jańa jyldyń kórki atanǵan jasyl shyrshanyń mańyna jınalǵan qaýym onyń bezendirilýine tánti boldy. Qalashyqtaǵy Aıaz ata men Qarshaqyz, jańa jyldyń sımvoly – tyshqan beınesi men ertegi keıipkerleri alańǵa kórik berip turǵandaı.
Qala turǵyndary men qonaqtaryna teatrlandyrylǵan qoıylym, kontserttik baǵdarlama usynyldy, sondaı-aq, ystyq sháı men nan ónimderi usynylǵan saýda núktesi de ornalastyryldy.
Sharaǵa oblystyq basqarmalar men memlekettik mekemelerdiń jáne qoǵamdyq uıymdardyń ókilderi, qala turǵyndary men jastary qatysty.
