Ermek Marjyqpaev karantındik shekteýlerge baılanysty óńir turǵyndaryna úndeý joldady
KÓKShETAÝ. QazAqparat - Aqmola oblysynyń ákimi Ermek Marjyqpaev karantındik shekteýlerdiń engizilýine baılanysty óńir turǵyndaryna úndeý joldady, dep habarlaıdy QazAqparat tilshisi oblystyq ishki saıasat basqarmasyna silteme jasap.
Aıta keteıik, osyǵan deıin habarlaǵanymyzdaı, naýryzdyń 31-nen saǵat 19:00 bastap karantındik shekteý sharalary engiziletin boldy.
Aımaq basshysy óz sózinde koronavırýs ınfektsııasyna baılanysty jaǵdaıdyń kún saıyn qıyndap bara jatqanyn atap ótti.
«Oblys aýmaǵyna ınfektsııa taratýdyń oshaǵy bolyp tabylatyn Tselınograd aýdany erekshe alańdatyp otyr. Osy kezeńde Aqmola oblysynyń aýmaǵyna tranzıttik júk avtokóligin, sondaı-aq azyq-túlik taýarlarymen, dárilik zattarymen jáne medıtsınalyq buıymdarymen, óndiristik taýarlarymen, sonymen qatar oblystyń ónerkásip jáne aýyl sharýashylyǵy kásiporyndarynyń irkilissiz jumys isteýin qamtamasyz etý úshin materıaldar tıelgen júk avtokólikterin qospaǵanda, barlyq avtokólik quraldarynyń kirýine jáne shyǵýyna tyıym salynady», - dedi Ermek Marjyqpaev.
Shekteý sharalary ýaqytynda óz qyzmetin toqtatatyndar: ishinde azyq-túlik dúkenderi men dárihanalary barlardy qospaǵanda iri saýda ortalyqtary, saıabaqtar, monsha keshenderi, sanatorııalyq-kýrorttyq nysandar, sulýlyq salondary, shashtarazdar, azyq-túlik, avtomobıl, turmystyq zattar men qurylys bazarlary, sondaı-aq adamdar jappaı jınalatyn basqa da obektiler. Azamattar úı-jaılaryna kelmeıtin, tapsyrystardy shyǵarý men jetkizý boıynsha táýlik boıǵy rejımde qyzmet kórsetetin obektilerdi qospaǵanda, qoǵamdyq tamaqtanýdyń obektileri jumysyn toqtatady. Dárihanalar men dárihana kıoskileri jumysyn shtattyq rejımde jalǵastyrady. Oblys turǵyndary óte mańyzdylyǵy bolmasa úılerinen shyǵýyn shekteýi qajet, maska men birjolǵy qolǵap kıip, qoldaryn antıseptıkpen jýýy tıis. 65 jastan asqan azamattar ózin-ózi oqshaýlaý arqyly rejım saqtasyn.
Jalpy, oblysta tıisti qyzmetterdiń karantın rejımin engizý úshin daıyndyǵy qamtamasyz etildi.
«Árıne, osy sharalar keı jaǵdaıda azamattarymyzdyń quqyqtaryn shekteıtini sózsiz, alaıda qazirgi aýrýdyń qamtý kóleminiń jyldam taralýy jaǵdaıynda olar mańyzdy jáne qajetti, sebebi ol koronavırýs ınfektsııasynyń taralýyna jol bermeýge jáne oblys turǵyndarynyń densaýlyǵyn saqtaýǵa baǵyttalǵan», - dep atap ótti aımaq basshysy.
