Ermek Marjyqpaev gaz jarylysynan qaza tapqandardyń otbasyna barynsha kómek kórsetýdi tapsyrdy
KÓKShETAÝ. QazAqparat - Aqmola oblysynyń ákimi Ermek Marjyqpaev Shortandy aýdanynyń Shortandy aýylynda gaz jaralysynan qaıtys bolǵandardyń otbasyna barynsha kómek kórsetýdi tapsyrdy, dep habarlaıdy QazAqparat.
Oblys ákimi jarylys bola salasymen oqıǵa ornyna attanǵan bolatyn.
«Meniń tapsyrmammen tótenshe jaǵdaıdy joıý jónindegi jedel shtab quryldy. Zardap shekkenderge psıhologııalyq jáne materıaldyq kómek kórsetilip jatyr. Qaza tapqandardy jerleý rásimine kómek kórsetiledi. Baspana máselesi sheshilgenshe jarylys bolǵan úı ıelerine ýaqytsha baspana beriledi. Eshkim de nazardan tys qalmaıdy»,-dedi Ermek Marjyqpaev.
Óńir ákimi baspasóz qyzmetiniń habarlaýynsha, oblys basshysy aldymen Shortandy aýdandyq aýrýhanasyna bardy. Onda jarylystan zardap shekken 6 adamdy Nur-Sultandaǵy kúıik ortalyǵyna jetkizý máselesin sheshti. Zardap shekken taǵy 3 adamnyń jaǵdaı turaqty bolǵandyqtan olar Shortandy aýdandyq aýrýhanasynda qaldy.
Ermek Marjyqpaev sonymen qatar, órttiń shyǵý sebebin muqııat anyqtaýdy tapsyrdy. Oqıǵanyń sebep-saldaryn anyqtaý maqsatynda jedel-tergeý toby men órtti zertteý laboratorııasy jumysyn bastady.
Keshirek Aqmola oblysy ákiminiń tóraǵalyǵymen ókiletti organ ókilderiniń qatysýymen jedel shtabtyń otyrysy ótti. Shtab jumysynyń aıasynda zardap shekkenderge kómek kórsetildi.
Qazirgi tańda jarylystan zardap shekken otbasylar týystarynyń úılerine ornalastyryldy. Sondaı-aq olardyń keıbireýine ýaqytsha baspana berilip, qaza tapqandardy jerleý rásimine kómek kórsetildi.
Oblystyq meshit janyndaǵy qaırymdylyq qory qaza tapqandar men zardap shekkenderdiń otbasylaryna kómek uıymdastyrdy. Shortandy aýylynyń ákimdigi zardap shekkenderge birinshi kezekte qajetti zattardy qabyldap jatyr.
Aıta keteıik, 16 qarasha kúni Aqmola oblysynyń Shortandy kentinde gaz ballony jarylyp, 3 adam kóz jumdy, taǵy on adam aýrýhanaǵa tústi.
Oqys oqıǵa túngi saǵat 22:00 shamasynda Shortandy kentinde Lıneınaıa kóshesi 28 meken-jaıy boıynsha ornalasqan úsh páterli turǵyn úıde boldy. Gaz ballonynyń jarylýy saldarynan 3 páterli jeke úı órtenip, onyń bir bóligi qulady.
Oksana Matasova
