Ermek Marjyqpaev: Bıyl óńirde 5 myńǵa jýyq otbasy baspanamen qamtylady
KÓKShETAÝ. QazAqparat – Aqmola oblysynyń ákimi Ermek Marjyqpaev halyqqa esep berý kezdesýinde turǵyn úı qurylysy salasyndaǵy jobalardyń júzege asyrylýy týraly málimdedi, dep habarlaıdy QazAqparat tilshisi.
Aımaq basshysy atap ótkendeı, óńirde turǵyndardy baspanamen qatamasyz etýde turǵyn úı qurylysy boıynsha birqatar memlekettik baǵdarlamalar júzege asyrylýda.
«2017 jyldan bastap «Nurly jer» memlekettik baǵdarlamasy qolǵa alyndy. Atalǵan baǵdarlama boıynsha biz kósh basyndamyz. Baǵdarlama iske asyryla bastaǵaly barlyǵy 13 myńnan astam otbasy baspana máselesin sheshti. 2019 jyly 4650 páter paıdalanýǵa berildi. Bıýdjet qarajaty esebinen 9 jaldamaly jáne 11 nesıelik úı salyndy», - dedi E.Marjyqpaev.
Osy jyly 5 myńǵa jýyq otbasyn baspanamen qamtamasyz etý josparlanyp otyr. 19 jalǵa beriletin turǵyn úımen oblystyń 10 óńiri qamtylatyn bolady. Bul degenimiz 867 páter.
«Turǵyn úı satyp alýǵa jańa múmkindikter men suranys «7-20-25» turǵyn úı nesıeleý baǵdarlamasy arqyly oń sheshimin tabýda. Bul baǵytta búgingi kúni 574 ótinim maquldanyp otyr», - dep tolyqtyrdy E.Marjyqpaev.
Aıta ketý kerek, az qamtylǵan jáne kópbalaly otbasylar úshin bólek kezek qurylǵan. Olarǵa 172 jalǵa beriletin páter bólingen, bul ótken jylǵa qaraǵanda eki esege kóp.
