Ermek Marjyqpaev: Aýylda adamdardyń turýy men jumys isteýine jaǵdaı jasalýy kerek
KÓKShETAÝ. QazAqparat – Aqmola oblysynyń ákimi Ermek Marjyqpaev jumys saparymen Tselınograd aýdanynda boldy.
Oblys ákimi aýdan basshylyǵyna Nur-Sultan qalasynan shyǵa beriste jergilikti ónimderdi satý úshin kommýnaldyq bazar ashý týraly tapsyrma berdi, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.
Aımaq basshysy Tselınograd aýdanynyń shalǵaı ornalasqan Mánshúk aýylynda «Manshýk-AE» JShS óńirdiń taýar óndirýshilerimen kezdesip, egin oraǵy jáne mal sharýashylyǵyn damytý barysyn talqylady.
«Rodına» agrofırmasy» JShS dırektory Ivan Saýer men «Manshýk-AE» JShS dırektory Tımýr Pshenov astyq shyǵymdylyǵy men spasy týraly aıtyp berdi. Olardyń sózinshe, bıylǵy jyly astyq shyǵymdylyǵy jyldaǵydan sál azdaý bolsa da, sapasy jaman emes kórinedi.
Tımýr Pshenov basshylyq jasap otyrǵan sharýashylyqtyń menshiginde 50 myń gektar egistik alqaby men 1000 bas iri qarasy bar. Topyrqaty óńdeýde «No Till» nóldik tehnologııa qoldanylýda. Bıylǵy jyly ortasha alǵanda ár gektarynan 11,3 tsentnerden bıdaı, 14,8 tsentnerden arpa alynýda. 2011 jyldan beri kásiporynnyń damýyna 4 mıllıard teńgeden astam qarjy quıylǵan.
Aımaq basshysy «Manshýk-AE» JShS qarajatyna salynǵan dúkendi aralap kórdi. Dúken sóreleri azyq-túlikke tolyp turǵanyna qaramastan aımaq basshysy «Rodına» agrofırmasy» JShS tájirıbesine júginip, óz ónimderin jergilikti turǵyndarǵa jeńildetilgen baǵamen satý qajettigin atap ótti.
«Manshýk-AE» JShS aýyldaǵy balabaqshaǵa jóndeý jumystaryn júrgizýde. Sonymen qatar, óz jumysshylaryna jańa úı salýda. Mundaǵy jumysshylardyń ortasha eńbekaqysy 180 myń teńgeni quraıdy.
Budan bólek, aımaq basshysy orta mektepte bolyp, pedagogıkalyq ujymmen kezdesti. «VІ Group Construction» holdınginiń baqylaý keńesiniń tóraǵasy, osy aýyldyń týmasy Baýyrjan Isabaevtyń ınvestıtsııalyq qarajatyna salynǵan sport alańy jáne áleýmettik sala jumysshylaryna arnalǵan jataqhanany aralap kórdi.
«Týǵan aýyldy kórkeıtý, turǵyndarǵa qolaıly jaǵdaı jasaý, jumysshylarǵa jaqsy áleýmettik paket jasaýdaǵy bıznesmender bastamasynyń mańyzy zor. Aldaǵy ýaqytta da aýylda adamdardyń turýy men jumys isteýine barlyq jaǵdaı jasalýy kerek», dedi aımaq basshysy.
