Ermek Marjyqpaev aýyl mektebiniń jertólesin jóndeýdi tapsyrdy

KÓKShETAÝ. QazAqparat - Aqmola oblysynyń ákimi Ermek Marjyqpaev Arshaly aýdanyna jumys sapary barysynda Jibek joly aýylynda boldy, dep habarlaıdy QazAqparat tilshisi.

Ákimdiktiń baspasóz qyzmetiniń málimetinshe, aımaq basshysy Imanjúsip Qutpanuly atyndaǵy orta mektepke qajetti aǵymdaǵy jóndeý jumystaryna nazar aýdarǵan. Shilde aıynyń basynda osy aýylǵa kelgende aımaq basshysy mekteptiń sý jınalyp qala beretin jertólesin jóndeýdi tapsyrǵan edi. Jazdygúni jer asty sýy kóterilip, 50 santımetr deńgeıge jetti. Osyǵan baılanysty aýdan ákimdigi mekteptiń jertólesine jóndeý jumystaryn júrgizý úshin jobalyq-smetalyq qujattama ázirledi. Oblys ákimi ony kelisý jáne bekitý boıynsha sharalardy tezdetýdi tapsyrdy. Osy arqyly jóndeý jumystaryna oblystyq bıýdjetten qarjy bólinedi.

Jibek joly aýylynyń №4 móltek aýdanynda oblys ákimi ınjenerlik-kommýnıkatsııalyq ınfraqurylym qurylysynyń barysymen tanysty. Osynda Nur-Sultan qalasynyń mańyndaǵy eldi mekenderdi damytý baǵdarlamasy sheńberinde uzyndyǵy 35 shaqyrym kóshe salý boıynsha eki jyldyq joba júzege asyrylýda. Jóndeý jumystary maýsymda bastaldy, 21 shaqyrym jolǵa asfalt tóselýde. Bul jumystardy qazannyń 20-syna deıin aıaqtaý josparlanyp otyr.

Bıyl uzyndyǵy 38 shaqyrymdyq joldyń qurylysy aıaqtalady. Budan bólek, 54 shaqyrym sý qubyry jelisi tartylýda.