Ermek Marjyqpaev: Aqmola oblysynda epıdahýaldy turaqtandyrýǵa baǵyttalǵan jumys júrgizilip jatyr
NUR-SULTAN. QazAqparat – Aqmola oblysynda koronavırýsqa baılanysty epıdemıologııalyq ahýaldy turaqtandyrýǵa baǵyttalǵan jumys júrgizilip jatyr. Bul týraly búgin Úkimet otyrysynda Aqmola oblysynyń ákimi Ermek Marjyqpaev aıtty, dep habarlaıdy QazAqparat tilshisi.
«Óńirdegi epıdemıologııalyq jaǵdaıdy turaqtandyrýǵa baǵyttalǵan jumys júrgizilýde. Sońǵy aptada jalpy aýrýdyń ortasha ósimi 0,8 paıyzdy qurady.
Sońǵy táýlikterde - 1,2 paıyz nemese 99 jaǵdaı. 526 adam statsonarda em alyp jatyr. Onyń ishinde 41 adamnyń jaǵdaıy aýyr. Aýrýdyń artýyna jol bermeý jáne karantın sharalaryn kúsheıtý úshin barlyq qajetti shara qoldanylady», - dedi ol.
Onyń aıtýynsha, azyq-túlik emes dúkenderdiń, saýda oıyn-saýyq ortalyqtardyń jumys tártibi 30 paıyz tolýyna qaraı tańerteńgi saǵat 10-nan 22-00-ge deıin, úı-jaılardaǵy qoǵamdyq tamaqtaný nysandarynyń qyzmeti saǵat 09-00-den 20-00-ge deıin shekteldi. Monıtorıng toptarymen jyl basynan beri 346 reıd ótkizildi. 1 212 nysan qamtyldy. Ótken aptada ınfektsııalyq statsıonarlarda, onyń ishinde aýyldarda tósek-oryn sany artty. Reanımatsııalyq tósek-oryndardyń jabdyqtalýy 100 paıyzdy quraıdy.
«Búgingi tańda Ulttyq saraptama ortalyǵynyń biryńǵaı portalymen yqpaldastyrylǵan 3 zerthana jumys isteıdi. Táýligine 1 700-den 2 myńǵa deıin test ótkiziledi. Qajettiligine qaraı zerthanalardyń rezervtik qýaty táýligine 7 myńǵa deıin test ótkizýge múmkindik beredi», - dedi Ermek Marjyqpaev.
