Ermek Marjyqbaev zerendilikterge jańa kópir salýǵa ýáde etti
KÓKShETAÝ. QazAqparat - Aqmola oblysynyń ákimi Ermek Marjyqpaev jumys saparymen Zerendi aýdanynda bolyp, Zarechnyı jáne Bereznıakovka aýyldarynyń turǵyndaryna Shaǵalaly ózeni arqyly ótetin kópir salatyndyǵy týraly ýáde berdi, dep habarlaıdy QazAqparat tilshisi.
Belgili bolǵandaı atalmysh kópir sonaý 80 jyldary salynǵan. Onyń uzyndyǵy 54 metrdi quraıdy. Qazirgi kezde nysan apatty jaǵdaıda. Aımaq basshysymen kezdesýge atalymsh eldi mekenniń turǵyndary men aqsaqaldary keldi. Jurtshylyqtyń kópir salynady dep kútip júrgenine 27 jyl bolypty. Aýyl turǵyndarynyń kóbi Kókshetaý qalasy men Zerendi aýylynda jumys isteıdi. Sondyqtan, avtokólik kópirinsiz jumysqa qatynaý qıyn.
«Bul kópirdi qarjylandyrýda biz halyqtyń sanyna qaraımyz. Shyntýaıtyna kelsek, eki eldi mekende barlyǵy 960 adam turady, sondyqtan, bul nysan bolmaýy kerek edi. Oblys úlken, budan basqa da túıitkildi másele jeterlik. Degenmen, depýtattardyń saýaldary men turǵyndardyń ótinishterin eskere kele, biz kópirdi salýdy bastaıtyn bolyp otyrmyz», - dedi Ermek Marjyqpaev.
Aımaq basshysynyń sózinshe, konkýrstyq sharalardy ýaqtyly ótkizý jumystary ǵana qalǵan. Bıylǵy jyly kópir qurylysy bastalyp, salynyp bitedi. Joba quny - 368, 2 mıllıon teńgege baǵalanyp otyr. Temirbeton kópirdiń uzyndyǵy - 76 metr, eni - 11 metr, al kólik júretin eni - 6 metr.
Zerendi aýdanynyń ákimi Baýyrjan Ǵaısa atalmysh aýyldardyń keleshegi baryn atap ótti.
«Bul aýyldar qalaǵa, Sadovoe jáne Zarechnoe aýyldaryna jaqyn ornalasqan. Ketip jatqandar joq, kerisinshe kelip jatqan adamdar kóp», - dep atap ótti aýdan ákimi.
Turǵyndardyń aıtýynsha, osy kópir arqyly Qostanaı tas jolynan Zerendi jáne odan ári Atbasar jolyna shyǵýǵa bolady.
