Ermek Marjyqpaev: Ulttyq Olımpıada komıteti Parıjdegi jaǵdaıdan sabaq alyp, sapaly jumys júrgizýi qajet
ASTANA. KAZINFORM – Parıj Olımpıadasynyń qorytyndysyna arnalǵan alqa otyrysy ótti. Bul týraly Týrızm jəne sport mınıstrliginiń baspasóz qyzmeti habarlady.
«Ózderińiz bilesizder, keshe ǵana Memleket basshysy Qasym-Jomart Kemeluly Olımpıada júldegerlerimen kezdesti. Sportshylar men bapkerlerdi memlekettik nagradalarmen marapattady. Sportqa júıeli qoldaý kórsetip, jan-jaqty damyǵan, salaýatty ult qalyptastyrý mańyzdy ekenin atap ótti. Jekelegen sport túrleri boıynsha nátıjeni jaqsartý kerek. Biz úshin dástúrli sanalatyn sport túrleri bar. Solardan daıyndyq tómen, nátıje nashar bolyp shyqty. Byltyr Hanchjoýda Azııa oıyndary ótti. Azıadaǵa qatysqan sportshylardyń 80 paıyzy bıyl Parıjge bardy. Al Hanchjoýdan ulttyq quramanyń qandaı nátıjemen kelgeni bárimizge belgili. Tarıhtaǵy eń nashar Azıada boldy. Soǵan qaramastan az ýaqyt qalsa da, jaǵdaı jasadyq. Biraq Parıjdegi nátıjeni ózderińiz bilip otyrsyzdar», - dedi mınıstr.
Ermek Marjyqpaev mindettemelerge sáıkes erkin kúres komandasy qola medal alýǵa ýáde bergenin atap ótti. Alaıda sportshylar shırek fınalǵa óte almaı, birinshi aınalymnan shyǵyp qaldy. Tipti medal jeńip alý jaǵynan eń sátsiz degen Tokıo Olımpıadasynda qola medal bolǵan edi.
«Tarıhta alǵash ret áıelder kúresinen sportshylar Oıyndarǵa qatysqan joq. Buryn bizde dástúrli túrde jaqsy pozıtsııalar bolǵan», - dedi mınıstr.
Ermek Marjyqpaev óńirlerdiń jaǵdaıyna toqtaldy.
«Ulttyq quramaǵa 17 óńirdiń sportshylary kirdi. Almaty (17), Astana (14) jáne Shymkent (12) ókilderi kóp joldamaǵa ıe boldy. Al Qostanaı, Ulytaý jáne Mańǵystaý oblystarynyń sportshylary birde-bir lıtsenzııa alǵan joq. Júldeger sportshylar kelesi oblystardan shyqty: Jambyl oblysy (altyn – Smetov E.), Almaty qalasy (kúmis – N. Qurbanov, 3 qola: Ǵ.Qyrǵyzbaev, N.Qyzaıbaı, I.Sátpaev jáne A.Le), Astana qalasy (kúmis –N.Oralbaı), Almaty oblysy (kúmis – D. Jadyraev)», - dep atap ótti mınıstr.
Ermek Marjyqpaev jergilikti atqarýshy organdar olımpıadalyq sport túrlerine basymdyq berip, salany damytý saıasatyn qaıta qaraýy qajet ekenin aıtty.
«Qazirden bastap múddeli taraptarmen birge aqparattyq-túsindirý jumystaryn júrgizý kerek. 6 aıdan keıin Harbınde 9-shy Qysqy Azııa oıyndary ótedi. Mılan men Kortına-dAmpetstso qalalarynda ótetin 25-shi Qysqy Olımpıada oıyndaryna da az ýaqyt qaldy. Ulttyq quramanyń daıyndyǵyn kúsheıtý qajet», - dedi mınıstr.
Mınıstr Parıj Olımpıadasynyń qorytyndysyna arnalǵan alqa otyrysyndaǵy baıandamasyn aıaqtaı kele joǵaryda ataǵan sharalar aldaǵy ýaqytta jemisin beretinine senim bildirdi.
«Sportty basqarýǵa, sportshylardyń daıyndyǵyna jaqsy áser etedi dep oılaımyn. Biz jańa Olımpıadalyq tsıkldi qazirden bastadyq. Alda Los-Andjeles Olımpıadasy kútip tur. Mańyzdy dodaǵa qazirden daıyndalý kerek. Mınıstrlik, federatsııalar, bapkerler, ákimdikter, Ulttyq Olımpıada komıteti Parıjdegi jaǵdaıdan sabaq shyǵaryp, sapaly jumys júrgizýi qajet. Bul – bárimizge ortaq mindet», - dep qorytyndylady alqa otyrysyn.
