Ermek Marjyqpaev pen Gennadıı Golovkın ulttyq quramanyń Olımpıadaǵa daıyndyǵyn talqylady
ASTANA. KAZINFORM – Astanada QR týrızm jáne sport mınıstri Ermek Marjyqpaev pen Qazaqstan UOK prezıdenti Gennadıı Golovkın Frantsııa astanasy Parıj qalasynda ótetin Olımpıada oıyndaryna qatysatyn quramanyń daıyndyǵyn talqylady.
QR Ulttyq olımpıadalyq komıtettiń baspasóz qyzmeti atap ótkendeı, kezdesýdiń basty taqyryby – jazǵy oıyndarǵa daıyndyqtyń sońǵy kezeńi, sondaı-aq, UOK pen Mınıstrlik qyzmetkerleriniń tórtjyldyqtyń basty dodasyna daıyndyq deńgeıi boldy.
Buǵan deıin eki uıym basshylary arasynda sporttyq delegatsııany jasaqtaý barysynda bapkerler men keshendi ǵylymı top múshelerine (dárigerler, massajshylar) basymdyq beriletini jaıly kelisim jasalǵan. Osylaısha, Parıjdegi Olımpıada oıyndaryna qansha atlet attansa, sonsha bapker men medıtsınalyq qyzmet mamandary jol tartady.
Ekeýara áńgime barysynda Týrızm jáne sport mınıstri men Qazaqstan UOK basshysy otandyq sportty damytyp, ulttyq qurama halyqaralyq deńgeıde, onyń ishinde, jańa olımpıadalyq tsıklde jaqsy nátıje kórsetý úshin kúsh biriktirýdiń mańyzdy ekenin taǵy da atap ótti.
Jumystyń naqty jospary Parıjdegi Olımpıada oıyndary aıaqtalǵan soń talqylanbaq.
Sondaı-aq, Gennadıı Golovkın Qazaqstan UOK komandasynyń Astanada ótetin aýqymdy is-shara kezinde halyqaralyq yntymaqtastyqqa járdemdesip, Dúnıejúzilik kóshpendiler oıyndaryn uıymdastyrýǵa kómektesýge daıyn ekenin málimdedi.
Esterińizge sala keteıik, Frantsııa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵynda ótedi. Oıyndarǵa álemniń 205 elinen 10 500 sportshy qatysady dep josparlanǵan. Onda 32 sport túrinen 329 medal jıyntyǵy sarapqa salynady.
