Ermek Marjyqpaev: Bizdiń maqsat - Djakartadaǵy Azıada nátıjesin jaqsartý
Ermek Marjyqpaev Hanchjoýda ótetin XIX Azııa oıyndarynyń saltanatty ashylý rásimi aldynda Qazaqstan quramasy turatyn jáne jattyǵatyn sportshylar qalashyǵyna bardy, dep habarlaıdy QazAqparat.
Mınıstr eń aldymen, osy Azıadada elimizdiń namysyn qorǵaıtyn qyz-jigittermen kezdesip, sary qurlyqtyń basty sporttyq jarystarynda eń joǵary nátıje tiledi. Sportshylardyń kóńil – kúıi kóterińki, jeńiske degen jigeri men daıyndyqtary jaqsy.
Odan keıin sportshylarymyzdy ornalastyrýǵa, tamaqtanýǵa, logıstıkaǵa jáne basqa da mańyzdy máselelerge jaýapty jedel shtabtyń jumysymen tanysty. Shtab qyzmetkerleri jumys qalaı júrip jatqanyn aıtyp, nátıjeleri týraly esep berdi. Aıta ketý kerek, Qazaqstan quramasyna táýlik boıy qoldaý kórsetiledi. Shtab qyzmetkerleriniń sportshylarmen bir ǵımaratta turýy kez-kelgen problemany óte tez sheshýge múmkindik beredi.
«Bizge Qazaqstan atynan jarysqa qatysatyn sportshylardyń jattyǵý jabdyqtary men alańdaryna tolyq qol jetkizýi, jaıly turýy, demalýy jáne jarystarǵa esh ýaıymsyz daıyndalýyna jaǵdaı jasaý óte mańyzdy. Uıymdastyrýshylyq sıpattaǵy máseleler jattyǵýlar men medıtsınalyq baqylaýdan kem emes. Biz bárimiz - Qazaqstan quramasymyz, sondyqtan birigip, aldymyzda turǵan maqsat - Djakartadaǵy Azıada nátıjesin jaqsartýǵa barlyq kúsh-jigerimizdi salýymyz kerek»,- dedi Ermek Marjyqpaev.
Eske salsaq, Hanchjoýdaǵy Azıadaǵa Qazaqstannan sporttyń 30 túrinen 524 sportshy (262 er jáne 262 áıel) qatysady. Onyń 27-si olımpıadalyq baǵdarlamaǵa, qalǵan 3-i olımpıadalyq emes sport túrlerinen synǵa túsedi. Sonymen qatar, aldaǵy jarystarda 8 sport túrinen: boks, sadaq atý, qazirgi bessaıys, júzý, breıkıng, kógaldaǵy hokkeı, tennıs jáne jeńil atletıka boıynsha Parıj Olımpıadasyna lıtsenzııalar oınalady.
Jalpy alǵanda, Azııanyń 45 elinen kelgen 15 myńnan astam sportshy 40 sport túrinen 481 medal jıyntyǵyna talasady.
