Ermek Marjyqpaev: Boksshylardyń fızıkalyq daıyndyǵynda kem tustar kóp
Memleket basshysynyń tapsyrmasyna sáıkes, týrızm jáne sport mınıstri Ermek Marjyqpaev Qytaıda ótken Azııa oıyndarynyń qorytyndysy boıynsha federatsııalardyń esebin tyńdaýdy jalǵastyryp jatyr, dep habarlaıdy Kazinform.
Bul joly elimizdegi eń tanymal sport túrleri sanalatyn boks pen dzıýdo federatsııasynyń ókilderi esep berdi.
Jıynda olar sportshylardyń Hanchjoýdaǵy óneri týraly aıtyp, tómen nátıje kórsetýiniń sebepterin baıandady.
Ermek Marjyqpaev qazaqstandyq boksshylardyń fızıkalyq jáne fýnktsıonaldy daıyndyǵynda kem tustar kóp ekenin, áıelder boksynda rezervtiń joqtyǵyn atap ótti.
«Bárimiz Karına Ibragımovanyń (57 kg) fınaldaǵy, Aslanbek Shymbergenovtiń (71 kg) jartylaı fınaldyq jekpe-jeginde bolǵan jaǵdaı týraly jaqsy bilemiz. Alaıda, bul komandanyń jalpy kórsetken nátıjesine sebep bolmaýǵa tıis. Bizdiń boksshylar ekinshi raýndtan keıin sharshap qalyp jatyr. Federatsııanyń usynysymen sportshylardyń fızıkalyq daıyndyǵyn jaqsartý maqsatynda sheteldik keńesshi shaqyrylǵanymen, nátıje kóńildegideı bolmaı shyqty. Áıelder boksynda rezerv joq, bir sportshy barlyq týrnırge qatysyp shyǵady», - dedi týrızm jáne sport mınıstri.
Sonymen qatar Ermek Marjyqpaev dzıýdo federatsııasynyń esebin tyńdap, Azııa oıyndarynda jaqyn kórshilerimizden medal sany boıynsha da, jeke beldesýler boıynsha da qalyp qoıǵanymyzǵa toqtaldy.
«Bir ǵana mysal, Qazaqstan erler quramasynyń balýandary Hanchjoý tatamıinde Tájikstan sportshylarymen úsh ret kezdesip, ókinishke qaraı, sonyń ekeýinde qarsylastaryna jol berip qoıdy. Nátıjesinde Tájikstan men Qyrǵyzstan – 1 altynnan, Ózbekstan 3 altyn medal jeńip aldy», - dedi mınıstr.
Onyń aıtýynsha, keıingi jyldary dzıýdoshylardyń nátıjesi de, deńgeıi de tómendep barady.
«Sońǵy onjyldyqta dzıýdodan ulttyq qurama salystyrmaly túrde bir deńgeıde óner kórsetip keldi. Eldos Smetovtiń jetistikteri federatsııany alǵa tartty. Biraq qazir onyń jasyna saı kúsh-jigeri azdap sarqyla bastaǵanda ulttyq quramanyń shynaıy deńgeıi belgili boldy», - dedi Ermek Marjyqpaev.
Jıyn sońynda mınıstr ótken jarystardyń nátıjesine tereń taldaý júrgizýdi jáne sportshylardy aldaǵy Parıj Olımpıadasyna tyńǵylyqty daıyndaý úshin keshendi jospar ázirleýdi tapsyrdy.
