Ermek Kósherbaev pen Sergeı Lavrov kelissóz ótkizdi

ASTANA. KAZINFORM — Syrtqy ister mınıstri Ermek Kósherbaev elimizge resmı saparmen kelgen RF Syrtqy ister mınıstri Sergeı Lavrovpen kezdesti. 

— Ekonomıkalyq turǵydan alǵanda Reseı negizgi saýda seriktesterimizdiń biri ári ekonomıkamyzdyń iri ınvestory. Ótken jyldyń qorytyndysynda eki el arasyndaǵy taýar aınalymy 28 mıllıard dollardan asty jáne Memleket basshylary qoıǵan 30 mıllıard dollarlyq mejege senimdi túrde ilgerilep kelemiz. Investıtsııalyq yntymaqtastyq ta kezeń-kezeńimen damyp keledi. Reseıdiń Qazaqstan ekonomıkasyna salǵan ınvestıtsııa kólemi 29 mıllıard dollarǵa jetti. Al Qazaqstannyń Reseı ekonomıkasyna salǵan ınvestıtsııasy 9 mıllıard dollar, — dedi kezdesý barysynda Ermek Kósherbaev.

Onyń aıtýynsha, eki eldiń birlesken jobalarynyń portfeli qalyptasty.

— Perspektıvaly baǵyttar qatarynda energetıka, kólik-logıstıkalyq ózara baılanys, tsıfrlyq sheshimder jáne jasandy ıntellekt bar, — dedi mınıstr.

Ermek Kósherbaevtyń atap ótýinshe, Qazaqstanda Reseıdiń 9 joǵary oqý ornynyń fılıaldary jumys isteıdi. Olardyń qatarynda halyqaralyq qatynastar salasy úshin erekshe mańyzdy Máskeý memlekettik halyqaralyq qatynastar ınstıtýtynyń fılıaly bar. Sondaı-aq ótken jyly Ál-Farabı atyndaǵy Qazaq ulttyq ýnıversıtetiniń Omby qalasynda fılıalynyń ashylýy da mańyzdy kórsetkish sanalady. Qazirgi tańda 60 myńnan astam qazaqstandyq stýdent Reseı joǵary oqý oryndarynda bilim alyp jatyr.

Qazaqstannyń 60 joǵary oqý orny Reseıdiń 50 ýnıversıtetimen áriptestik baılanys ornatqan. 

Aıta ketelik Ortalyq Azııa elderi men Reseı ónerkásiptik kooperatsııany birlese damytýǵa ýaǵdalasqan edi.