Ermek Kósherbaev pen Beate Maınl-Raızınger KQK jumysyna qatysty ahýaldy talqylady
ASTANA. KAZINFORM - Qazaqstan Respýblıkasynyń Syrtqy ister mınıstri Ermek Kósherbaev Aýstrııa Respýblıkasynyń Eýropalyq jáne halyqaralyq ister federaldyq mınıstri Beate Maınl-Raızıngermen telefon arqyly sóılesti, dep habarlaıdy QR Syrtqy ister mınıstrliginiń baspasóz qyzmeti.
Taraptar Kaspıı Qubyr Konsortsıýmynyń (KQK) jumysyna baılanysty ahýal, halyqaralyq teńiz qatynasynyń qaýipsizdigi jáne qazaqstandyq munaıdy Eýropa naryqtaryna turaqty jetkizý máselelerin talqylady.
Atalǵan munaı tasymaldaý baǵytynyń úzdiksiz jumys isteýin qamtamasyz etýdiń mańyzdylyǵy atalyp ótti. Qazaqstan Aýstrııanyń shıki munaı ımportynyń shamamen 56 paıyzyn qamtamasyz etedi, onyń edáýir bóligi KQK arqyly jetkiziledi.
Syrtqy saıası vedomstvolardyń basshylary halyqaralyq jáne óńirlik kún tártibindegi ózekti máseleler jóninde pikir almasty.
QR Syrtqy ister mınıstri Aýstrııany 2027-2028 jyldarǵa BUU Qaýipsizdik Keńesiniń turaqty emes múshesi bolyp saılanýymen quttyqtap, Uıym aıasyndaǵy odan ári syndarly ózara is-qımylǵa daıyn ekenin bildirdi.
Taraptar turaqty baılanystardy jalǵastyrýdyń mańyzdylyǵyn atap ótip, qol jetkizilgen ýaǵdalastyqtar, onyń ishinde Federaldyq mınıstr Beate Maınl-Raızıngerdiń Qazaqstanǵa buǵan deıingi saparynyń qorytyndylary boıynsha ýaǵdalastyqtar aıasynda is-júzindegi ózara is-qımyldy odan ári damytýǵa daıyn ekenderin rastady.
Osyǵan deıin Syrtqy ister mınıstri Ermek Kósherbaev Eýropa Odaǵynyń Syrtqy ister jáne qaýipsizdik saıasaty jónindegi Joǵarǵy ókili — Eýropalyq komıssııanyń vıtse-prezıdenti Kaıa Kallaspen telefon arqyly sóılesken bolatyn.
