Ermek Kósherbaev Alakól kóliniń jaǵalaýyndaǵy demalys aımaqtaryn tekserdi
TALDYQORǴAN. KAZINFORM – Basymdyq beriletin týrıstik baǵyttardyń jaı-kúıin baǵamdaý maqsatynda óńirlerge jumys saparyn jalǵastyrǵan Premer-mınıstrdiń orynbasary Ermek Kósherbaev Jetisý oblysyndaǵy basty týrıstik baǵyttardyń biri sanalatyn Alakól kóli jaǵalaýy ınfraqurylymynyń jaǵdaıymen tanysty.
Oblys qurylǵannan beri Alakól aýdanyna 4,8 mln týrıst kelgen, sonyń 1,8 mln-ny ótken jyldyń úlesinde ekenin aıta ketken jón.
Sapar barysynda Vıtse-premer kommýnaldyq jaǵajaıda boldy, munda ózge de aımaqtardaǵy sııaqty keshendi turǵyda sheshýdi qajet etetin kóptegen júıeli máselelerdiń bar ekeni anyqtaldy. Bastapqy sharttar bar bolǵanymen, ashyq jáne qoljetimdi aýmaqtaǵy kóptegen demalys oryndarynda sanıtarlyq jaǵdaı, ınjenerlik jáne ınfraqurylymdyq jaǵynan birqatar túıtkilder saqtalyp qalyp otyr.
– Kommýnaldyq jaǵajaıda demalýǵa keletin adamdar da jekemenshik demalys aımaqtaryndaǵydaı bazalyq jaılylyqpen, qaýipsizdikpen qamtamasyz etilýi tıis. Bul – ádilettilik qaǵıdasy. Adam qaı jerde de taza, tártipti ári retti ortada demalýy kerek, - dep atap ótti Ermek Kósherbaev.
Premer-mınıstrdiń orynbasary aýdan ákimi men jaýapty salalarǵa jaǵajaıdaǵy sanıtarlyq jabdyqtaýdy kúsheıtý, qosymsha qoqys jáshikterin satyp alý, sýdaǵy belgiler jelisin uzartý jáne shaǵyn kólemdi kemelerge arnalǵan qaýipsiz kirý aımaqtaryn belgileý jóninde birqatar tapsyrma berdi. Sonymen qatar kıim aýystyratyn oryndar, dýsh kabınalaryn ornatý, abattandyrý, sonyń ishinde belsendi demalys aımaqtaryn qalyptastyrý múmkindigin qarastyrý tapsyryldy.
Qoǵamdyq qaýipsizdikti qamtamasyz etý úshin jaǵalaý aýmaǵynda kezekshilik atqaratyn TJ qyzmetkerleriniń sanyn arttyrý máselesi qarastyrylatyn bolady. Jaǵajaıdaǵy jaıma saýda máselesine de erekshe nazar aýdaryldy. Vıtse-premer saýda núkteleri retinde sý jáne elektr jelisine qosylǵan turaqty dúńgirshekter ornatý kerektigin jáne olarda sanıtarlyq-epıdemıologııalyq talaptardyń qatań saqtalýy qajettigin atap ótti.
– Bul máseleler tek Alakólge ǵana emes, eldegi barlyq óńirlerge tán. Mundaı túıtkilder elimizdiń demalys aımaqtarynda jıi týyndaıdy. Biz barlyq usynystardy jınaqtap, úzdik tájirıbelerdi saralap, Týrızm jáne sport mınıstrliginde jaýapty memlekettik organdardyń qatysýymen arnaıy keńes ótkizetin bolamyz. Týrızm — tek bıznes emes, bul eń aldymen azamattardyń ómir súrý sapasynyń kórsetkishi, - dedi Ermek Kósherbaev.
Sapar aıasynda Vıtse-premer Aqshı aýylyndaǵy temirjol vokzalynda da bolyp, týrıstermen tildesti. Týrısterdiń pikirine qaraǵanda, munda oń ózgerister baıqalady, alaıda jaǵajaılardyń keıbir aımaqtarynda túıtkildi máseleler demalys sapasyna áli de kóleńke túsirýde.
– Alakólge otbasymyzben alǵash ret kelip otyrmyz. Vokzalda da, jaǵajaıda da rettilik bar. Jaǵajaılarda, kıim sheshetin oryndar men dýsh kabınalary kóbirek bolsa eken deımiz, - dedi pikirin bildirgen demalýshy Galına Chepryna.
Al almatylyq týrıster 8 jyldan beri bir jerge kelip demalyp júrgenin aıtady. Olar mundaǵy qyzmet kórsetý sapasy, aýasy, sýy — bári unaıtynyn da sóz etti. Sondaı-aq sóz sońynda jaǵajaı ýchaskesiniń qaı-qaısynyń da, ásirese tegin aımaqtardyń bir standartqa saı bolǵanyn qalaıtynyn jetkizdi.
Bıyl kól jaǵalaýynda elektrmen qamtamasyz etý máselesi sheshimin tapty. Beskólden Aqshı aýylyna deıin uzyndyǵy 56,7 shaqyrymdy quraıtyn joǵary kerneýli elektr jelisi men jańa qosalqy stansa salyndy. Maýsym aıynan bastap elektr energııasy úzdiksiz berilip keledi. Jaǵalaý aýmaǵy ınternetpen qamtylǵan, 16 bazalyq stansa jumys istep tur, sondaı-aq talshyqty-optıkalyq baılanys jelisi tartyldy.
Jumys salalyq mınıstrliktermen úılestirile otyryp júrgizildi. Jumys toby quramyna engen barlyq vıtse-mınıstrler óziniń jaýapty baǵyttary boıynsha demalys aımaqtaryna baryp, ondaǵy jaǵdaımen tanysty. Nátıjesinde olar vıtse-premerge olardyń qazirgi jaǵdaıy men qabyldanýy tıis qajetti sharalar týraly esep berdi.
– Biz ýaqytsha sheshim qabyldap otyrǵan joqpyz, uzaq merzimdi, turaqty júıe qalyptastyryp jatyrmyz. Qazaqstannyń týrıstik aımaqtary halyqtyń úmitin aqtap qana qoımaı, jańa standarttarǵa saı bolýy tıis. Bul tek týrıster úshin emes, eń aldymen qazaqstandyqtardyń ózderi úshin mańyzdy. Barlyq óńirlerge jasalǵan saparlardyń qorytyndysy boıynsha Úkimet deńgeıinde júıeli sheshimder qabyldanatyn bolady, - dedi sózi qorytyndylaǵan Ermek Kósherbaev.
Eske sala keteıik, buǵan deıin Ermek Kósherbaevtyń Qapshaǵaıdyń týrıstik ınfraqurylymymen tanysqanyn jazǵan edik.