Ermek Kósherbaev AQSh-ta G20 sammıtine Qazaqstannyń qatysýy boıynsha daıyndyq máselelerin talqylady
ASTANA. KAZINFORM - Qazaqstan Respýblıkasynyń Syrtqy ister mınıstri Ermek Kósherbaevtyń Vashıngtonǵa sapary aıasynda AQSh Memlekettik hatshysynyń birinshi orynbasary Krıstofer Landaýmen kezdesti.
QR Syrtyq ister mınıstrligi bapasóz qyzmetiniń habarlaýynsha, kelissózder barysynda taraptar ekijaqty kún tártibindegi ózekti máselelerdiń keń aýqymyn, onyń ishinde saıası jáne ekonomıkalyq ózara is-qımyldy, saýda men ınvestıtsııalardy damytý, energetıka jáne asa mańyzdy mıneraldar salasyndaǵy yntymaqtastyqty talqylady, sondaı-aq óńirlik jáne jahandyq qaýipsizdik máseleleri boıynsha pikir almasty.
Taraptar Qazaqstan men AQSh arasyndaǵy Keńeıtilgen strategııalyq seriktestikti odan ári damytýǵa beıildiligin rastady. Beıbitshilik keńesin qurý jónindegi amerıkalyq bastamasyna jáne osy formatqa Qazaqstannyń quryltaıshy el retinde qatysýyna erekshe nazar aýdaryldy.
Buǵan qosa, 2026 jylǵy jeltoqsanda Maıamı qalasynda ótetin G20 sammıtine Qazaqstannyń qatysýyna daıyndyq máseleleri talqylandy.
Mınıstr eldiń energııa resýrstary men asa mańyzdy mıneraldardyń jahandyq jetkizý tizbekteriniń turaqtylyǵyn qamtamasyz etýdegi strategııalyq rólin atap ótip, bul saladaǵy yntymaqtastyqty AQSh-pen ózara is-qımyldyń negizgi baǵyttarynyń biri retinde kórsetti.
Óz kezeginde, AQSh dıplomaty Qazaqstandy Ortalyq Azııadaǵy jáne halyqaralyq arenadaǵy senimdi seriktes retinde atap ótip, aldaǵy baılanystar ekijaqty qatynastar men praktıkalyq yntymaqtastyqty damytýǵa qosymsha serpin beretinine senim bildirdi.
Kelissózder barysynda QR Prezıdenti Qasym-Jomart Toqaevtyń Vashıngtonǵa sapary men «S5+1» sammıtiniń qorytyndysy boıynsha shamamen 17 mlrd AQSh dollaryn quraıtyn buryn qol jetkizilgen kelisimder men ınvestıtsııalyq jobalardy iske asyrý máselelerine erekshe kóńil bólindi.
Kezdesý qorytyndysy boıynsha taraptar qoldanystaǵy yntymaqtastyq formattary aıasynda, sondaı-aq jańa tetikter men bastamalardy iske qosý arqyly ekijaqty ózara is-qımyldy nyǵaıtýǵa ýaǵdalasty.
Aıta keteıik, QR Syrtqy ister mınıstri Ermek Kósherbaev AQSh Memlekettik hatshysy Marko Rýbıonyń shaqyrýymen Vashıngtonda ótken mańyzdy mıneraldar boıynsha birinshi mınıstrlik konferentsııasyna qatysty.