Ermek Amanshaev Máskeýde jaryq kórgen kitabynyń tusaýyn kesti

ALMATY. 12 naýryz. QazAqparat - Almatyda búgin 50-ge tolǵan dramatýrg, jazýshy, stsenarıst, Sháken Aımanov atyndaǵy «Qazaqfılm» AQ-nyń prezıdenti Ermek Amanshaev Máskeý qalasynda jaryq kórgen «V poıskah mıfa» kitabynyń tusaýkeserin ótkizdi. Alǵysózin reseılik jazýshy Anatolıı Kım jazǵan bul kitap «Hýdojestvennaıa lıteratýra» baspasynan jaryq kórip otyr. Onyń qazaqsha nusqasy «Ańyzdy ańsaý» degen atpen Astana qalasynyń «Saryarqa» baspasynan jaryq kórgen bolatyn. Oǵan Ermek Ámirhanulynyń novellalary, áńgimeleri, esseleri men dramatýrgııalyq shyǵarmalary engen.

«Men Ermektiń «Sultan bolsam eger men» pesasyn M.Áýezov atyndaǵy Qazaq memlekettik akademııalyq drama teatrynda jáne Shymkent qalasynyń teatrynda qoıdym. Onyń pesalary M. Áýezov teatrynda qoıylyp jatqan pesalardyń aldy dep esepteımin. Bul kitaby oqyrmandarǵa kóp oı salatyn ǵylymı eńbek», - deıdi KSRO Halyq ártisi Asanáli Áshimov. Al áıgili jazýshy, dramatýrg Dýlat Isabekov: «qazir kitaptyń quny ketken zaman. Jazýshy da, jazylyp jatqan kitap ta kóp. Alaıda, syn joq. Oqyrmandar adasyp júr. Ermektiń kitabyn oń baǵyttaǵy kitap dep sanaýǵa bolady», deıdi.