Ermek Amanshaev Qazaqstannyń tanymal tulǵalarymen birge Aqtaýda zorlanǵan qyzdy qoldap, aktsııa ótkizdi
ASTANA. QazAqparat - Ulttyq ǵylymı ana men bala ortalyǵynda Aqtaýda zorlanǵan kishkentaı Vıkany qoldaýǵa baǵyttalǵan aktsııa ótti.
Elorda ákiminiń orynbasary Ermek Amanshaev, 2016 jylǵy Olımpıada júldegeri Gıýzel Manıýrova, telejúrgizýshi Dınara Satjan, akter Ánýar Nurpeıisov pen ánshi Aıgúl Imanbaeva arnaıy jasalǵan úmit buryshyna jumsaq oıynshyqtar ákelip qoıdy. Bul týraly ákimdiktiń baspasóz qyzmetinen málim etti.
Vıkanyń eki ájesi aýrýhanada táýlik boıy kezekshilik etýde. Vıka aýrýhanaǵa 27 tamyzda óte aýyr halde jetkizildi, qazirgi kezde ol statsıonarlyq em qabyldaý ústinde.
«Uıymdastyrý, materıaldyq qoldaý jaǵynan bári de qarastyrylǵan, bastysy, esine kelip, saýyǵyp ketse eken. Bul óte aýyr jaǵdaı, qoǵam pedofılııamen birigip kúresýge tıis, osyndaı aýyr qylmys jasaǵandar zań boıynsha qatań jazalanýy kerek», - dedi Ermek Amanshaev.
Erte jastaǵy nevrologııa bóliminiń meńgerýshisi Altynshash Jaqsybaevanyń aıtýynsha, Vıka qazir úshinshi dárejedegi komada jatyr.
«Naýqastyń hali óte nashar, fýnktsııalardy qalpyna keltirý boıynsha boljamdar kóńil kónshiterlik emes. Ókinishke oraı, oryn alǵan jaǵdaıdyń saldarynan qyzdyń mıyna ottegi jetkilikti mólsherde jetkizilmegen, sonyń nátıjesinde bas mıy aýyr zardap shegip, jumys istemeıdi», - deıdi dáriger.
Olımpıada júldegeri Gıýzel Manıýrova oryn alǵan oqıǵaǵa baılanysty mektepterde ózin-ózi qorǵaý, sondaı-aq balalardy osy sııaqty jaǵdaılardan saqtaý úshin kóshede ózin-ózi ustaný erejelerin túsindirý boıynsha sabaqtar engizýdi usyndy.
