Ermegııaevtiń qorǵaýshylary apellıatsııalyq sottyń sheshimine qarsy qaıta shaǵym túsirmek

Aıta keteıik, búgin, 11 tamyzda Astanada Talǵat Ermegııaevtiń jáne «Astana EKSPO-2017» Ulttyq kompanııasynyń ózge de fıgýranttarynyń isi boıynsha appelıatsııalyq sot alqasynyń sheshimi shyqty.

Astana qalasynyń Qylmystyq ister boıynsha appelıatsııalyq sot alqasy Talǵat Ermegııaevke qatysty 9 maýsymdaǵy Astana qalasynyń qylmystyq ister jónindegi aýdanaralyq mamandandyrylǵan sotynyń úkimin ózgerissiz qaldyrdy.

Óz kezeginde T. Ermegııaevtiń qorǵaýshysy Anna Kotlova tilshilerge bergen suxbatynda bul sheshimmen kelispeıtindikterin jáne oǵan qarsy shaǵym túsiretindikterin málim etti.

"Bizdiń oıymyzsha, sot istiń barlyq qyrlaryn eskergen joq. Biz bul sheshimge qarsy sotqa shaǵym túsiremiz", - dedi ol.

Aıta keteıik, «Astana EKSPO-2017» Ulttyq kompanııasynyń burynǵy basshysy Talǵat Ermegııaev 9 maýsymda Astana qalasynyń qylmystyq ister jónindegi aýdanaralyq mamandandyrylǵan sotynyń úkimimen 14 jylǵa bas bostandyǵynan aıyrylǵan bolatyn.

Sonymen qatar oǵan materıaldyq jaýapkershiligi joǵary memlekettik laýazymdy ıelenýge ómir boıyna tyıym salynyp jáne "Parasat" ordeni qaıtaryp alynǵan edi.