«Ermegııaev isindegi» basty kúdikti Nádirbaev kinásin tolyq moıyndady
28 maýsym kúni Astana qalalyq prokýratýrasy kúdiktiniń bergen ótinishin qanaǵattandyrdy, osyǵan baılanysty Nádirbaevpen mámile túrindegi kelisim jasaldy, ol boıynsha kúdiktige 3 jylǵa bas bostandyǵynan aıyrý týraly shartty jaza belgilenedi. Qazirgi kúni is sottyń qaraýyna jiberilgen.
Aıta keteıik, Saıat Nádirbaev - «Astana EKSPO-2017» UK» AQ eks-basqarma tóraǵasy Talǵat Ermegııaevtyń senimdi tulǵasy. Basshysynyń tapsyrmasy boıynsha Nádirbaev EKSPO-2017 kórmesi aıasyndaǵy jymqyrylǵan jáne qolma qol aqshaǵa aınaldyrylǵan qarajatty Ermegııaevqa berip otyrǵan. Bul faktini sottalýshynyń biri Mars Shormanov («Kompanııa ADS» JShS eks- prezıdenti) ta moıyndaǵan, ol sotta 937 mln. teńge shamasynda qolma-qolǵa aınaldyrylǵan aqshany Ermegııaevqa onyń senimdi tulǵasy Nádirbaev arqyly bergenin aıtqan edi.
«Jalpy Nádirbaev bes márte Shormanovtan 200-300 mln. teńge shamasynda aqsha alyp, ony Ermegııaevqa berip otyrǵan. Alaıda, Nádirbaev aıybyn moıyndaıtyn bolǵandyqtan, Ermegııaevtyń basqa da senimdi tulǵalary onyń tergeýden qashýyn uıymdastyrǵan. Ermegııaevtyń baýyry N. Moldashev pen onyń tanysy S.Erejep jáne basqa da tulǵalar jeti aı boıy Nádirbaevty ártúrli páterlerde jasyryp kelgen. Іzdeý sharalarynyń nátıjesinde 28 naýryzda Nádirbaevty Sybaılas jemqorlyqqa qarsy kúres qyzmetkerleri ustady. Óz kezeginde Nádirbaevtyń jubaıy - Aıda Nádirbaeva tergeýge kedergi keltirip, shatastyrý maqsatynda BAQ arqyly birneshe márte málimdeme jasap, jalǵan aıǵaqtar kórsetken, kúıeýiniń urlanǵanyn, onyń zańsyz bas bostandyǵynan aıyrylǵanyn, oǵan Sybaılas jemqorlyqqa qarsy kúres qyzmetkerleriniń tarapynan zorlyqtar jasalǵanyn aıtqan. Al jalǵan kisi urlaýdy uıymdastyrýshylar Talǵat Ermegııaevtyń senimdi tulǵalary bolyp otyr. Qazirgi tańda Nádirbaevtyń tergeýden qashýyn uıymdastyrǵandarǵa qatysty qylmysty jasyrǵany úshin aıyp taǵylyp, olar qylmystyq jaýapkershilikke tartylýda», - delingen baspasóz baıanynda.