Ermaxan Ybyraıymov dopıng úshin jazany kúsheıtýge qatysty pikir bildirdi
NUR-SULTAN.QazAqparat -Jaqynda Májilis depýtattary dopıng úshin sportshylardyń jaýapkershiligin kúsheıtýge arnalǵan zań jobasyn birinshi oqylymda maquldaǵan bolatyn. Qazirgi kezde qosymsha usynystar daıarlanyp jatyr. Sonyń bári ekinshi oqylymda qaralady, dep xabarlaıdy QazAqparat tilshisi.
«Ol otyrysta men de bolǵanmyn. Sol jerde taza sportty qalaıtynymyzdy jetkizdim. Negizi, zań jobasynda kórsetilgen máselelerdi qoldaımyn. Osy qujatty qabyldasa, sportshylar da, bapkerler de, sport jetekshileri de jazany bilip, dopıngke jolamaıdy. Máselen, Olımpıada oıyndarynan kelgennen keıin syıaqyny beredi ǵoı, Prezıdent sen dopıng qoldandyń da, joq pa, ázirshe jartysyn ala tur degen áńgime joq. Ony alady da, bere salady. Biraq ustalǵan jaǵdaıda ol aqshany qaıtarý kerek bolady. Endi, dopıng qoldanatyn sporttyń túrleri, ol - jeńil atletıka, júzý, velosport, shańǵy, aýyr atletıka. Kúreste de qoldanyp jatady. Biraq onyń eshbir qajeti joq», - dedi E.Ybyraıymov QazAqparat tilshisine bergen suxbatynda.
Aıta keteıik, zań jobasy boıynsha dopıng qoldanǵandar aqshalaı syıaqyny qaıtarýǵa mindetteledi. Budan bólek, sportshylar, bapkerler men komanda jetekshileriniń aı saıynǵy tólemderi toqtatylady. Tipti, halyqaralyq jarystarda jaraqat alǵany úshin beriletin járdemaqydan da aıyrý josparlanǵan. Al syıǵa berilgen páterlerdi bastapqyda tek jalǵa alýǵa ǵana múmkindik bolady. 10 jyldyń ishinde WADA dopıng anyqtamasa, ol baspanany jekemenshikke aýdarýǵa bolady.
QR Parlamenti Májilisiniń depýtaty Olga Shıshıgınanyń oıynsha, Olımpıada chempıony bolǵan sportshylardyń syıaqysyn bólip tóleýge bolady.
«Endi, biz páter máselesin rettedik. Baspana aldymen jalǵa beriledi, artynan jekemenshikke aýdarýǵa múmkindik bar. Al aqshalaı syıaqy qalaı qaıtarylady? Negizgi másele - osy. Syıaqyny tolyǵymen qaıtarý qıyn ǵoı. Menińshe, aqshalaı syıaqyny birden bermeı, bólip tóleýge bolady. Áıtpese, qyrýar qarjyny berip, artynan ony qaıtarýdy talap etsek, sportshyǵa úlken salmaq túsedi. Ony barlyq tıtýldaryn alyp qoıady, páterinen shyǵaryp tastaıdy. Onyń ústine aqshalaı syıaqyny qaıtarý qajet. Bul - úlken materıaldyq ári psıhologııalyq aýyrtpalyq. Máselen, qazir bizde «sporttyq zeınetaqy» degen tólem bar. Mysaly, men ózim Olımpıada altyny úshin aı saıyn 24 aılyq eseptik kórsetkish (1AEK - 2 525 tenge) kóleminde sporttyq zeınetaqy alyp turamyn. Biraq ony alý úshin 20 jyldyq eńbek ótiliń de bolýy shart. Meniń oıymsha, sportshy Olımpıada chempıony atandy ma, kelesi aıdan bastap aqshalaı syıaqyny bólip, sporttyq zeınetaqy sııaqty berip otyrýǵa bolady», - dep atap kórsetti O.Shıshıgına.
