Ermahan Ybyraıymov jas sportshylarǵa úndeý joldady
«Jas sportshylarǵa eńbek etip, tek alǵa basyp, shydamdy bolýdy úırenińder dep aıtqym keledi. Jyldar boıy ómirin sportqa arnaǵan jandar mindetti túrde chempıon atanady. Kóptegen sportshylarymyz 2020 jylǵy Olımpıada oıyndarynda el namysyn qorǵamaq. Mine, sol básekege úlken daıyndyqpen attaný qajet. Sportshylar úshin árbir daıyndyq pen árbir jarystyń mańyzy zor. Jaraqattan aýlaq bolýdyń qamyn jasap, densaýlyqqa asa saqtyqpen qarańyzdar.
Tamaqtaný rejımin ustanyp, kez kelgen orynda kózge túse bermeńizder. Joǵary deńgeıli sportshynyń aldynda mindet kóp. Ol óziniń, otbasynyń ǵana emes, búkil memlekettiń aınasy. Sol sebepti, eń birinshi kezekte elińdi, sodan soń ózińdi tanytýyń kerek. Qazirgi tańda qazaq sportyndaǵy rezerv máselesi sheshilgen. Mınıstrlik, QR UOK, Federatsııalar qarqyndy jumys isteýde. Jalpy alǵanda, sportshylardyń jaǵdaıy kóńilden shyǵady. Olardyń jeńiske degen jigeri basym. Sportshylar el namysyn abyroıymen qorǵaýy úshin memleket úlken qarajat bólýde. Mine, sizdiń materıaldyq turǵydan jaǵdaıyńyzdy jaqsartýǵa da múmkindik bar.
Sondyqtan, jas sportshylarǵa tek alǵa qadam basyńdar degim keledi. Barlyq talpynystyń bir jaýaby bolady. Eń birinshi kezekte ózderińdi jeńip úırenińder. Eger dinı senimde bolsańyz, Jaratqanǵa qulshylyq etip, arenada kúná jasamaýǵa tyrysyńyz. Bul olımpıada chempıonanyna jaraspaıtyn qylyq. Qudaıdyń aldynda da eńbekqor ári taza bolý kerek. Sol kezde siz naǵyz chempıon bolasyz», - dedi Ermahan Ybyraıymov.
