Ermahan Ybyraıymov: Táýelsiz el bolmasaq, bul boks keshi de bolmas edi
ASTANA. QazAqparat - Astanada ótken Qanat Islam men Brendon Kýktyń jekpe-jegine Olımpıada chempıony Ermahan Ybyraıymov joǵary baǵasyn berdi, dep habarlaıdy QazAqparat tilshisi.
«Boks keshi ózderińiz kórgendeı asa tarysty, óte qyzyqty ótti. Basty jekpe-jek Qanat Islam men Brendon Kýktyń arasyndaǵy bul boks keshi elimizdegi eń myqty aıqastardyń biri bolyp tarıh qoınaýynda máńgi saqtalatyn bolady. Barlyq boksshylar tapsyrmany oıdaǵydaı oryndap shyqty. Eshkim jankúıerlerin jerge qaratqan joq. Bul qazaq eliniń, egemendigimizdiń maqtanyshy. Osyndaı táýelsiz el bolmasaq, bul boks keshi de bolmas edi. Sondyqtan ár qazaq táýelsizdiktiń qadirin bilý kerek», - dedi Ybyraıymov.
Sondaı-aq Olımpıada chempıony Astanadaǵy boks keshi jastardy sportqa tartýǵa úlken septigin tıgizetinin atap ótti.
«Elimizde osyndaı halyqaralyq deńgeıdegi jarystar jıi ótýi jastardy sportqa shaqyrýǵa úlken kúsh salady. Qanatqa eliktep júrgen qanshama qazaq balasy bar. Búgin ár qazaq óz shańyraǵynda otandasynyń ónerin tamashalady. Buny kórgen ár jas erteń sportqa degen qyzyǵýshylyǵy oıanady. Sol úshin osyndaı jarystardy elimizde jıi ótkizý kerek», - dep atap ótti ol.
Esterińizge sala keteıik, keshe Astanada Qanat Islam men Brendon Kýk arasyndaǵy boks keshinde Qanattan ózge taǵy segiz otandasymyz sharshy alańǵa shyǵyp, barlyǵy da qarsylastaryn aıqyn basymdylyqpen utqan bolatyn.
